Dual Panel1Sengko’ arassa badhana kobasana PANGERAN, ban Errohna abakta sengko’ toron ka cora se possa’ ban lang-tolang.
2Sengko’ etonton bi’ Pangeran alengleng e cora jareya, ban sengko’ nangale’e ja’ e saantero cora jareya bannya’ tolang se ce’ kerrengnga acalathagan.
3Pangeran adhabu ka sengko’, "He, manossa se ta’ langgeng, ba’ bisa’a lang-tolang jareya odhi’ pole?" Sengko’ mator, "GUSTE Allah Se Mahatenggi, namong Junandalem se ngagali."
4PANGERAN laju makon sengko’ manapa’ dhabuna ka lang-tolang se kerreng jareya,
5"Sengko’ GUSTE Allah Se Mahatenggi nyerrobbagiya nyaba ka dhalem ba’na sopaja ba’na odhi’a pole.
6Bi’ Sengko’ ba’na epasangana ora’ ban daging sarta ebetbedda ban kole’. Bi’ Sengko’ ba’na eberri’ana nyaba me’ olle odhi’. Daddi ba’na tao ja’ Sengko’ reya PANGERAN."
7Sengko’, Yehezkiel, pas acaca ka lang-tolang jareya menorot papakonna Pangeran. Ban teppa’na sengko’ acaca jareya, sengko’ ngedhing sowara tha’-karatha’an polana lang-tolang jareya molae asambung se settong ban settonga.
8Sabatara sengko’ ngabassagi, lang-tolang jareya molae metto ora’ ban daging, pas metto kole’ keya, tape dan-badan jareya gi’ ta’ anyaba.
9Allah adhabu ka sengko’, "He, manossa se ta’ langgeng, mara acaca ka angen. Kabala ja’ Sengko’, GUSTE Allah Se Mahatenggi marenta’agi ka angen sopaja angen jareya dhatengnga dhari man-dhimman kaangguy nyerrobbagiya nyaba ka dhalem dan-badan se mate jareya sampe’ odhi’ pole."
10Daddi sengko’ acaca menorot se edhabuwagi Pangeran, ban angen pas nyerrobbagi nyaba ka dhalem dan-badan jareya sampe’ odhi’ pole ban bisa manjeng. Bannya’na ta’ sakera-kera, cokop kaangguy epadaddi kasatuwan tantara se raja.
11Allah adhabu ka sengko’, "He, manossa se ta’ langgeng, lang-tolang jareya lambangnga bangsa Isra’il. Bangsa jareya aserro ja’ aba’na kerreng, ta’ andhi’ pangarebban ban ta’ andhi’ are pagi’.
12Daddi kassa’ ba’na aramallagi ka Tang ommat Isra’il ja’ Sengko’ GUSTE Allah Se Mahatenggi mokka’a koburanna. Tang ommat jareya bi’ Sengko’ epakalowara dhari koburan jareya, pas epabaliya ka tana Isra’il.
13Saellana Sengko’ ajalannagi jareya kabbi, Tang ommat bakal taowa ja’ Sengko’ PANGERAN.
14Sengko’ nyerrobbagiya nyaba ka dhalem lang-tolang jareya sopaja odhi’ pole, samarena jareya reng-oreng jareya bi’ Sengko’ epabisa’a enneng e nagarana dibi’. Daddi reng-oreng jareya tao ja’ Sengko’ PANGERAN. Sengko’ PANGERAN la ngoca’ ban tanto ajalannagi jareya."
15PANGERAN adhabu pole ka sengko’,
16"He, manossa se ta’ langgeng, kassa’ ngala’ tongket, e attassa pas tolese, ‘Karaja’an Yehuda’. Pas ngala’ tongket laen, e attassa tolese: ‘Karaja’an Isra’il’.
17Pas teggu’ tongket se dhadhuwa’ jareya sampe’ konco’na acampo daddi tongket settong.
18Mon bangsana ba’na atanya apa artena jareya,
19kabala ka reng-oreng jareya ja’ Sengko’, GUSTE Allah Se Mahatenggi ngala’a tongket se alambangngagi Isra’il sarta nyambunga tongket jareya ban tongket se alambangngagi Yehuda. Tongket se dhadhuwa’ jareya bi’ Sengko’ epadaddiya settong ban eteggu’a bi’ Tang tanang.
20Teggu’ tongket se dhadhuwa’ jareya, duduwagi ka bangsa jareya.
21Pas kabala ka bangsa se dhadhuwa’ jareya ja’ Sengko’, GUSTE Allah Se Mahatenggi ngala’a Tang ommat dhari ra-nagara se eentare bangsa se dhadhuwa’ jareya. Bi’ Sengko’ epakompola kabbi, pas egiba’a abali ka nagarana dibi’.
22Bi’ Sengko’ reng-oreng jareya epadaddiya settong bangsa e tana jareya, e pagunongan Isra’il. Reng-oreng jareya bakal eparenta’a rato settong, ban ta’ pecca’a daddi bangsa otabana karaja’an dhadhuwa’ pole.
23Reng-oreng jareya bakal ta’ manajjisa aba’na pole kalaban agabay dusa ban nyemba ka la-brahala se majitjit. Reng-oreng jareya bi’ Sengko’ epalopoda dhari sabarang lalakon se nyalethong se andaddiyagi aba’na akiyanat ka sengko’. Sengko’ masocceya reng-oreng jareya; reng-oreng jareya bakal daddiya Tang ommat, ban Sengko’ daddiya Allahna.
24Reng-oreng jareya bakal epadaddiya settong eparenta rato settong akantha Daud se bakal marenta’a salanjangnga. Reng-oreng jareya bakal estowa ajalannagi Tang kom-hokom. Ban salanjangnga reng-oreng jareya sana’ potona bakal ngennengngana tana jareya, tana se bi’ Sengko’ ebagi ka Yakub ban ekennengnge bangatowana.
25(37:24)
26Sengko’ mabadha’a parjanjiyan ban reng-oreng jareya se daddiya tanggungan kaangguy kaamananna reng-oreng jareya salanggengnga. Sengko’ aberkadana ban namba’ana bannya’na reng-oreng jareya. E tana se ekennengnge reng-oreng jareya Sengko’ maddegga Tang Padalemman se bakal badha’a e jadhiya salanjangnga.
27Sengko’ ennengnga e jadhiya ban reng-oreng jareya, Sengko’ daddiya Allahna reng-oreng jareya, ban reng-oreng jareya daddiya Tang ommat.
28Mon Tang Padalemman la badha e nga’-tengnga’anna reng-oreng jareya salanjangnga, sa-bangsa laen tanto tao ja’ Sengko’, PANGERAN, la mele bangsa Isra’il epadaddi Tang ommat dibi’."