Alkitab Mobile SABDA
[VER] : [MADURA]     [PL]  [PB] 
 <<  Yesaya 2 >> 

1Areya’ pessen se edhabuwagi Allah parkara Yehuda ban Yerusalim se etarema Yesaya pottrana Amos:

2E re-are se bakal dhateng reya gumo’ kennengnganna Padalemman Socce e nonggul ce’ tenggina ban manjeng sodek e attas nong-gunong ban mo’-gumo’. Sa-bangsa bakal entara ka jadhiya anyo-ronyo,

3kabbi padha ngoca’, "Mara ja’ ongga’a ka Gumo’na PANGERAN, ka Padalemmanna Allah Isra’il. Salerana bakal ngajarragiya sengko’ ban ba’na apa se kodu elakone sengko’ ban ba’na. Sengko’ ban ba’na noro’a jalanna, sabab pangajaranna PANGERAN dhari Yerusalim asalla, Salerana abu-dhabu dhari Siyon."

4Salerana bakal ahakimana e antarana sa-bangsa, ban motose parkara e antarana ku-suku bangsa. Peddhang bakal etempa’a epadaddi salaga, ban tombak epadaddi ladding panyokor. Sa-bangsa ambuwa se saleng serrang, ban ambu se aya-sadhiya entara aperrang.

5He, toronanna Yakub, mara ja’ ajalana e dhalem tera’na PANGERAN!

6Ya Allah, Junandalem ampon adinggallagi ommadda, toronanna Yakub! Sabab e man-ka’dhimman e nagara ka’dhinto oreng ngangguy elmo tennong sareng elmo seher se asalla dhari oreng temor sareng oreng Filistin. Reng-oreng gapaneka nerowe adadda reng-oreng manca se talebat bannya’na apolong e ka’dhinto.

7Nagarana bannya’ emmas sareng salakana, artana ta’ sakera-kera. Jaranna talebat bannya’na, karetana ta’ kabilang.

8E man-ka’dhimman badha brahala, sarengngan reng-oreng gapaneka nyemba ca-arca badhiyanna dibi’.

9Saneyap oreng badhi eya’-seya’a sareng eaebbagiya. Ja’ parenge sapora reng-oreng gapaneka, GUSTE!

10Reng-oreng jareya bakal maso’a ka dhalem wa-guwa e mo’-gumo’ karang, otabana ngaleya lobang e dhalem tana sopaja lopoda dhari babendunna PANGERAN ban dhari kobasana se molja.

11Manossa se sombong bakal eaebbagiya ban se angko epasojuda. Pera’ PANGERAN se bakal eagungngagiya.

12PANGERAN Se Mahakobasa la neptebbagi settong are kaangguy ngaebbagi reng-oreng se matenggi aba’na ban ngokoma reng-oreng se sombong ban se angko.

13Ka-bungkana comara Libanon se tenggi ban sakabbinna kajuwan raja e Basan bakal epamateya.

14Nong-gunong ban mo’-gumo’ se tenggi bakal eparata’a.

15Ra-manara se tenggi ban dhung-geddhungnga binteng bakal epagujura.

16Pal-kapal se paleng raja ban paleng bagus bakal epanyellemma.

17Manossa se sombong bakal eaebbagiya ban se angko epasojuda. Pera’ PANGERAN se bakal eagungngagiya.

18La-brahala bakal mosna’a kabbi.

19E bakto PANGERAN ngadek ban magundhek bume, oreng bakal maso’a ka wa-guwa e mo’-gumo’ karang otabana ngaleya lobang e dhalem tana sopaja lopoda dhari babendunna PANGERAN ban dhari kobasana se molja. Mon are jareya la napa’, la-brahala emmas ban salaka se esemba reng-oreng jareya, la-brahala gabayanna tanangnga reng-oreng jareya dibi’, bakal edina’agiya ka tekos ban babburu.

20(2:19)

21(2:19)

22Daddi, ja’ ngarep ka manossa se ta’ langgeng, sabab manossa reya tadha’ ajina.


  Share Facebook  |  Share Twitter

 <<  Yesaya 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran