Alkitab Mobile SABDA
[VER] : [MAKASAR]     [PL]  [PB] 
 <<  Kejadian 41 >> 

1Allaloi ruan taung, asso’nami karaeng Mesir. Asso’nai ammenteng ri birinna Binanga Nil.

2Ti’ring nia’mo nacini’ tuju kayu sapi sannaka ngaseng co’mo’na siagang accillaka kalenna, assulu’ battu ri anjo binangaya, nampa angnganre ruku’ ri birinna anjo binangaya.

3Nampa nia’ pole tuju kayu sapi maraeng ammumba. Anjo sapia sanna’ ngaseng roso’na, bukkulenna mami anrokoki buku-bukunna. Ammentemmi anjo sikamma sapi rosoka ri sa’rinna anjo sapi co’moka, ri birinna anjo binangaya.

4Nampa anjo sikamma sapi rosoka nakanremi anjo sikamma sapi co’moka. Le’baki anjo ambangummi karaenga ri tinrona.

5Nampa attinro poleang, nasso’namo pole. Lalang so’nana, nia’ nacini’ tuju bulere’ gandung sannaka baji’na assinna siagang ti’no’mi.

6Se’re tangke napattimboi anjo bulereka. Nampa attimbomo pole tuju bulere’ gandung maraeng, sannaka ngaseng roso’na, siagang opai napakamma anging parang.

7Nampa nia’lu’mo anjo tujua bulere’ gandung bajika assinna ri anjo tujua bulere’ gandung opaya. Le’baki anjo ambangummi karaenga siagang angngu’rangimi angkana asso’nai.

8Bari’basa’na lussa’mi karaenga. Jari nasuro kio’mi sikontu pacinika siagang tu panritaya ri Mesir. Nampa nacarita anjo so’nana mae ri ke’nanga. Mingka tena manna sitau akkulle ampakasingaraki battuanna anjo so’nana.

9Nakanamo pangngurusu’ inunganga ri karaenga, "Anne alloa musti namangakui kasalanna atanta.

10Pirangngalloang larroki’ ri pangngurusu’ rotia siagang mae ri anne atanta. Nampa kipantama’ ikambe ri balla’ tarungkua, iamintu ri balla’ tahananna kapala pangawalaka ri ri balla’ karaenga.

11Ri se’reang bangngi, asso’nama’ sipa’rua, nampa tanaassenga ikambe apa battuanna anjo so’naya.

12Mingka nia’ sitau turungka battu ri Ibrani naagang ikambe anjoreng. Ia palayanna kapala pangawalaka ri anjo balla’ karaenga. Nacaritami ikambe anjo so’nana ikambe mae ri ia. Nampa napakasingara’mo battuanna anjo so’nana ikambe.

13Na sikontu anjo apa napaua sicoco’ sikali siagang apa kajarianga, iamintu: anne inakke atanta, kipoteranga’ ammotere’ mange ri jama-jamangku riolo. Mingka anjo pangngurusu’ rotia kihukkung matei."

14Jari nasuro allemi karaenga anjo Yusuf, nampa napasulu’ linta’ battu ri tarungkua. Le’baki accukkuru’ Yusuf siagang nasambei pakeanna, mangemi andallekang ri karaenga.

15Nakanamo karaenga mae ri ia, "Le’bakka’ asso’na, namanna sitau tena akkulle ampakasingaraki apa battuanna. Nia’ angkabarrangi ri nakke angkanaya akkulleko ampakasingaraki battuanna so’naya."

16Appialimi Yusuf angkana, "Teai anne atanta karaeng, mingka Allata’ala lampakasingara’ bajiki."

17Nampa nakanamo karaenga, "Asso’na angkanaya niakka’ ammenteng ri birinna Binanga Nil.

18Nampa nia’mo kucini’ tuju kayu sapi sannaka co’mo’na siagang accillaka kalenna, assulu’ battu ri binangaya. Mangemi angnganre anjo sikamma sapia ri biring binangaya.

19Nampa nia’mo pole ammumba tuju kayu sapi maraeng, sannaka ngaseng roso’na, bukkulenna mami anrokoki buku-bukunna. Tenale’bakapa’ accini’ sapi kammaya anjo kodina ri Mesir.

20Nampa anjo sapi-sapi rosoka nakanremi anjo tujua sapi co’moka sumpadeng.

21Mingka le’ba’na anjo tuli roso’na anjo sapi-sapi rosoka. Nampa ambangumma’ ri tinroku.

22Nampa attinroa’ pole, mingka asso’nama’ pole. Nia’ kucini’ tuju bulere’ gandung bajika assinna siagang ti’noka ngaseng rapponna, attimbo ri se’rea tangke.

23Nampa attimbo pole tuju bulere’ gandung sannaka ngaseng roso’na siagang opaya rapponna napakamma anging parang.

24Nampa anjo bulere’ gandung bajika assinna nia’lu’mi ri anjo bulere’ gandung opaya. Le’ba’mi kucarita anne ruaya so’naku mae ri sikamma pacinika, mingka tena manna sitau akkulle ampakasingaraki apa battuanna."

25Nakanamo Yusuf ri karaenga, "Anjo ruaya so’na sangkammai battuanna. Napabattuang maki’ Allata’ala apa eroka Nagaukang.

26Anjo tujua sapi co’mo’ battuanna iamintu tuju taung, siagang anjo tujua bulere’ gandung bajika assinna battuanna tuju taung tonji. Jari anjo ruaya sangkammai battuanna.

27Tujua sapi roso’, ia ammumbaya ri boko, kammayatompa tujua bulere’ gandung opa lanri anging parang, battuanna iamintu tuju taungi lawattu kacipurang.

28Sangkamma napaua atanta sumpadeng, Napappicinikammi Allata’ala ri katte apa eroka Nagaukang.

29Labattui sallang tuju taung wattu kala’biang ri apa-apa naparalluanga taua ri sikontu pa’rasangang Mesir.

30Le’baki anjo labattumi wattu kacipurang tuju taung sallona. Sa’genna nikaluppai taba sikalimo anjo wattu kala’bianga ri kanre-kanreang, lanri sanna’ duduna anjo wattu kacipuranga, sa’genna kalotoro’ anne pa’rasanganga.

31(41:30)

32Pinruangki’ asso’na. Anjo battuanna iamintu, anjo passalaka le’ba’mi Napattantu Allata’ala, siagang tenamo nasallo naNapa’jari.

33Lanri kammana, bajiki punna kipileimo se’rea tau cara’de’ siagang tau bajika. Nampa kisare koasa untu’ angngatoroki anne pa’rasanganga.

34Musti kiangka’ tongi pagawe-pagawe maraengannaya, nampa kisare koasa angngallei bage limanna battu ri sikontu wassele’ kattoang gandunga lalang tujua taung sallona ri kala’bianna taua. Nampa kiboli’ siagang kisuro jagai yangasenna anjo wasseleka lalang ri kota-kotaya.

35(41:34)

36Yangasenna anjo gandung nibolika la’jari kanre nipasadia untu’ nipake sallang punna narapi’ wattu tuju taunga kacipurang ri Mesir. Na lanri kammana anjo tenamo nalamate cipuru’ ra’yaka."

37Nasitujui karaenga siagang sikamma pagawena anjo rancanana Yusuf.

38Nampa nakanamo karaenga ri ke’nanga, "Tena olota lakkulle anggappa tau maraeng la’bi cocokangngang naanne Yusuf, lanri ia nipimpingi ri RohNa Allata’ala."

39Jari nakanamo karaenga ri Yusuf, "Allata’alami le’ba’ ampauang ngasengko yangasenna anne. Jari a’nyatami angkanaya ikaumi la’bi cara’de’ siagang la’bi baji’ battu ri yangasenna maraenganga.

40Ikaumi lakuangka’ a’jari guburnur, siagang sikontu ra’yakku lamannuruki ri parentanu. Inakkeji bawang la’bi koasa irateangannu."

41Le’baki anjo napasulu’mi battu ri karemenna karaenga cincing niaka ukiri’ sitempele’na kakaraenganga. Nampa napantama’ ri karemenna Yusuf na nakana, "Kamma-kamma anne kuangkakko a’jari guburnur mae ri sikontu Mesir." Nampa napipakei Yusuf juba kaeng lenang halusuka, siagang nipikalukiang kallonna se’re rante bulaeng.

42(41:41)

43Nampa napassareang mae ri Yusuf kareta kakaraengang makaruaya untu’ napake Yusuf, siagang a’jappami pangawala’ kala’biranna karaenga ri dallekanna anjo karetaya, nakkiok-kio’ anjo pangawalaka angkana, "Tutuko! Sarei oloang! Sarei oloang!" Kammaminjo naniangka’mo Yusuf a’jari guburnur mange ri sikontu Mesir.

44Nakanamo karaenga ri ia, "Inakke karaeng. Na kupa’la’bammo angkanaya punna tena nukellai, tena manna sitau akkulle anggaukang apa-apa ri sikontu Mesir."

45Nampa nisaremo areng Mesir ri karaenga anjo Yusuf, iamintu niarengi Zafnat-Paaneah. Nisare tommi sitau baine niarenga Asnat, ana’na Potifera, a’jari imanga ri kota Heliopolis. Umuru’na Yusuf tallumpulo taung ri wattunna appakkaramula anjama untu’ karaeng Mesir. Jari a’lampami Yusuf battu ri balla’ kakaraenganga mange angkulilingi najappai sikontu pa’rasanganga.

46(41:45)

47Lalang wattu tuju taung ri wattu kala’bianna taua ri kanre-kanreang, alla’bi-la’bimi wassele’ buttaya nagappaya taua.

48Napasse’remi Yusuf anjo gandunga nampa naboli’ ri kota-kotaya. Lalang ri massing kotaya ammoli’mi gandung, wassele’na sikamma koko a’reppeseka ri anjo kotaya.

49Anjo gandung napasse’rea teai sipato’ jaina. Sa’genna tenamo nalitereki Yusuf lanri jaina sanrapangi kassika ri biring tamparanga.

50Ri tenanapa nabattu anjo wattu kacipuranga, ammana’mi Asnat, iamintu bainenna Yusuf. Rua ana’na, sangnging bura’ne.

51Nakanamo Yusuf, "Napa’jarimi Allata’ala kukaluppai sikontu pa’risikku siagang mae ri sikamma bija pammanakanna manggeku." Lanri kammana naaremmi anjo ana’ bungasa’na "Manasye".

52Nakanamo pole, "Nasarema’ ana’ Allata’ala ilalang ri kasukkarrangku." Nampa naareng anjo ana’ makaruaya "Efraim".

53Allalomi tuju taung ri wattu nikasia’na kala’bianga ri kanre-kanreang anjo ri pa’rasangang Mesir.

54Jari battumi wattu tuju taunga sallona kacipuranga, sicoco’ le’ba’ siagang apa le’baka napau Yusuf. Kajariammi wattu kacipuranga ri sikontu linoa, mingka ri sikontu pa’rasangang Mesir nia’mo kanre-kanreang nipasadia.

55Ri wattunna appakkaramulamo ra’yaka ri Mesir naalle cipuru’, appala’mi ke’nanga apa lanakanrea mae ri karaenga. Nampa nisuromo ke’nanga ri karaenga mange ri Yusuf. Naturukimi ke’nanga sikontu apa naparentakanga Yusuf mae ri ke’nanga.

56Ri wattunna pila’ a’jari sarrimmo anjo kacipuranga, siagang alla’bammi mae ri sikontu pa’rasanganga, nasungkemi Yusuf sikamma gudanga nampa nabalukang anjo gandunga mae ri tu Mesir.

57Nia’mi taua battu ri sikontu linoa mange ri Mesir untu’ ammalli gandung battu ri Yusuf, lanri anjo kacipuranga pila’ sarrimmi kajarianna ri kere-keremae.


  Share Facebook  |  Share Twitter

 <<  Kejadian 41 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran