Alkitab Mobile SABDA
[VER] : [SANGIR]     [PL]  [PB] 
 <<  Matius 24 >> 

1Sarạeng Mawu Yesus dimal᷊engke naněntangu Wal᷊em Mawu e, tangu manga murit'E himaung si Sie kụ němpaněbọeng saheng kakakoạ u Wal᷊em Mawu e si Sie.

2Kutẹu i Yesus něhengetang si sire, "Nakasilo wue patikụ ene i kamene? Kasingkạko, mambeng těngadẹ̌ u, tawẹu watu sarang sěmbaụ bọu manga wal᷊e tamai ini e bẹ̌dang mawala mạdal᷊ěnsung sěmbaụ su wal᷊ine, su ěnnạe. Kěbịe sarung těnnehang."

3Bọu e Mawu Yesus simaka sol᷊ong Bukid'u Zaitun, tangu piạ e i Sie mạiang, manga murit'E himaungke mědeạu mahumbisara ringang'E mẹ̌těngo. "Pěhabarẹ̌ko si kami kụ kai angerẹ tempone patikụ ene sarung mariadi," angkuěng i sire si Sie. "Kai mangạe tatiala apa ngae pělahekangu rarěntan Tuang dingangkewe lai kasueěngu runia?"

4Mawu Yesus simimbang, "Pakapapia wue, kumbahangbe sarung i kamene kaakal᷊eng.

5Batụ u taumata l᷊awọe sarung měmpẹ̌děnta ringangu areng-Ku kụ měmpẹ̌bera, 'Kai Iạ e Ratu Mananal᷊amatẹ̌!' I sire kai sarung měngakal᷊ẹ̌ taumata l᷊awọ.

6I kamene sarung makaringihẹ̌ tingihu pẹ̌sasekẹ e dingangu habar'u pẹ̌sasasekẹ e, kaiso abe kěngkatakụ. U kěbị ene mang harusẹ̌ mariadi, kai ene wal᷊inewe tempone seng mẹ̌kiamatẹ̌.

7Bansa sěmbaụ sarung mẹ̌sekẹ dumokạ bansa wal᷊ine, dingangu kararatuang sěmbaụ sarung měngalo kararatuang bal᷊ine. Kụ suapan tampạ sarung piạ karal᷊unusẹ̌ dingangu mělinuhẹ̌.

8Kụ patikụ ene wuhụewe panẹ̌takenge, kere tědụ u sěngkatau wawine su tempon měhěnding.

9Bọu e i kamene sarung samekang kụ isarakang mědeạu pahangeng dingangu pateěng. Patikụ dunia e sarung měmpẹ̌binsị i kamene ual᷊ingu i kamene kai muritẹ̌-Ku.

10Su tempo ene sarung mal᷊awọ taumata měmpẹ̌sohọ dingangu mẹ̌daral᷊aị ore lai měmpẹ̌binsị sěmbaụ dingangu wal᷊ine.

11Lawọ mahang nabi sarung měmpẹ̌lěto, kụ makaakal᷊ẹ̌ taumata l᷊awọ.

12Karal᷊akịe mangken mạhuntinambang katoghase hakịu taumata l᷊awọe selaing tawe makakoạ mẹ̌kakěndagẹ̌.

13Arawe i saịewen mạtatanạ satia sarang pangěnsueěnge ute sarung iapakasal᷊amatẹ̌.

14Kụ Injilẹ̌ e mạanung kereapa Mawu Ruata mẹ̌parenta ute sarung ihabarẹ̌ su kaguwạu dunia, tadeạu patikụ umatẹ̌ e makaringihẹ̌. Mase wuhụewe ruměnta kiamatẹ̌."

15"I kamene sarung makasilo, 'Karal᷊akisẹ̌ kụ makawihua', kere ilẹ̌habar'i Nabi Daniel, dụdarisị su tampạ susi. (Kaketạ suapam mẹ̌bawasane: Ěnnaiko kaia mangal᷊ene!)

16Su tempo ene i saing ene su Yudea harusẹ̌ tumal᷊ang sol᷊ong bawul᷊udange.

17I sain su wowong atụ u wal᷊e abe lintụ měngal᷊ạ apa-apa wọu ral᷊ungu wal᷊e.

18I sain su waelẹ̌ abe pẹ̌sul᷊e měngal᷊ạ l᷊akụe.

19Kạěngkěhang ěllo ene su manga wawine piạ kapapia, ringangu su manga wawine kạpanusune rariọ!

20Pěmpẹ̌kal᷊iomanengko tadeạu kumbahang sarang i kamene harusẹ̌ tumal᷊ang su tempong pẹ̌dasehang arau su ěllon Sabatẹ̌!

21Su ěllo makạgaghěnggang ene sarung piạ kasasusa masaria kerẹewe wẹ̌dang ta nạdiadi rokeng bọu tětạu dunia sarangkewen orasẹ̌ ini, ringangu selaing tawe mẹ̌saụ.

22Kai manga Mawu Ruata e tawe mangěsọ tempone ute; tawẹ u sarang sěngkatau masal᷊amatẹ̌. Kai ual᷊ingu umat'E, ute Mawu Ruata e nangěsọ u tempo ene.

23Kụ su tempo ene kereu piạ sěngkatau mẹ̌bera si kamene, 'Kakělla, Ratu Mananal᷊amatẹ̌ e ěndaung sini!' arau 'i Sie paị sene!' -- ute abe pěmpangimang su tau ene.

24U kai sarung luměto mahang kristus e ringangu mahang nabi. I sire sarung měmpẹ̌koạ manga hal᷊ẹ̌ makadal᷊inaụ dingangu makạl᷊aherang mědeạu makaakal᷊ẹ̌, sěngapam botonge sarang su kawanuan Duata ewe lai.

25Kụ, pẹ̌tahěndungko! U Iạ e seng něhabarẹ̌ si kamene kal᷊amona těntal᷊ang hal᷊ẹ̌ ene ta nạdiadi.

26Kereu piạ u mẹ̌bera si kamene, 'Kakělla, i Sie ene pai su wanua l᷊inggi!' -- kumbahang i kamene tamai. Arau kereu i sire měmpẹ̌bera, 'Kakělla, i Sie měkẹ̌kěmbuni su ral᷊ungu kamarẹ̌ ěndaị sini e!' -- ute abe pangimang.

27U rarěntang Ahus'u Taumata e kai mẹ̌sul᷊ungu sěnnang u kilạ bọu sěmběkan daki, kụ mạtuahẹ̌ sol᷊ong sěmběkam bahẹ.

28Suapan piạ kasuang ute sene piạ manụ tahapanemọ kasuang."

29"Tangu lěpasewen napal᷊usẹ̌ kasasusan tempo ene ute, matangěllo e sarung marěndung, dingangu wul᷊ang e seng tawe suměnnang. Manga wituing e sarung měngkahondosẹ̌ bọu l᷊angị, dingangu kal᷊awọu mangangawasa kinoaěng e sarung mẹ̌kal᷊emboghang.

30Bọu e tatialang Ahus'u Taumata e sarung ikasilo su l᷊angị. Su tempo ene patikụ umatẹ̌ su dunia e sarung mahul᷊ungkang. I sire sarung makasilo Ahus'u Taumata kạděntane su wowom binawa ringangu kawasa ringangu kawawantugẹ̌ masěllahẹ̌.

31Napiri gaghuwạe sarung tiukang, kụ Ahus'u Taumata sarung měndoloh'u manga malạekatẹ̌ ipangomol᷊ẹ̌ kawanuan'E wọu kěbị bukun dunia ěpạ e, dingangu wọu pungu l᷊angị sěmbaụ sarang pungu l᷊angị bal᷊ine."

32"Pěngal᷊ạko těntiro wọu kalung ara, kereu manga hakondane kawe melong dingangu masasikome, ringangu manětạe humětị, i kamene masingkạu tempom pědisẹ̌ e seng marani.

33Kerene lai kereu i kamene makasilo hal᷊ẹ̌ tamai ene mariadi, i kamene masingkạu tempone seng masandi-sandigẹ̌.

34Kasingkạko! Hal᷊ẹ̌ tamai ene sarung mariadi těntal᷊ang taumata apan měbẹ̌biahẹ̌ orasẹ̌ ini e, měngkairị kěbị.

35Langị dingangu dunia e sarung mapaghohẹ̌, arawe wawera-Ku e tatapẹ̌ sarang marěngụ-děngụ."

36"Tawẹu masingkạ měnsang angerẹ ěllone ringangu orase, manga malaekatẹ̌ su sorga e wěga, Ahus'u Taumata e mal᷊aing běga, samatang i Amang tumbạ masingkạe.

37Kamageng Ahus'u Taumata e ruměnta ute, kakakoạe kai mẹ̌sul᷊ungu su tempong Nuh nạung.

38Su pira ěllo těntal᷊ang ta nědẹ̌darulung gẹ̌guwạe, taumata e mạhungkaěng měmpạnginung dingangu měmpẹ̌kẹ̌kawing. Kerene sěntiniạ sarạeweng nịdating u ěllon Nuh nasake su ral᷊ungu kapal᷊ẹ̌.

39Sarạeng darulunge nangelọe si sire kěbị buhụe i sire nakahěngangu kaia seng nariadi. Kerene lai kakakoạe sarung kereu Ahus'u Taumata e ruměnta.

40Su tempo ene piạko ruang katau su waelẹ̌ kạpamunarane: Sěngkataue sarung paringaneng, arawe sěngkataụe wue itěntang.

41Manga wawine ruang katau e kạpěnggilinge gandung: Sěngkatau paringaneng, sěngkataụewue itěntang.

42Tangu pakal᷊ahěkosẹ̌ bue, u i kamene wẹ̌ga wue měnsang angerẹ Mawunu sarung duměnta.

43Pẹ̌tahěndungko ini! Kereu manga taghuangu wal᷊e e masingkạu kai pukul᷊ẹ̌ pira su hěbi kụ piạ tahatako e sarung duměnta, ute i sie tawe mẹ̌tikị, tadeạu tahatako e tawe sumuẹ̌ sol᷊ong dal᷊ungu wal᷊ene.

44Ual᷊ingu ene, i kamene mal᷊aing pakarariahi. Batụ u Ahus'u Taumata e sarung duměnta su orasewe i kamene tạ pěngangantibe."

45Angkuěngu Mawu Yesus kapia, "Kamageng kerene, kai ěllang sude masatia ringangu matahuěnna? Seng i sie niruị u mawune nakoạ těmbonang u manga ěllang bal᷊ine; tadeạu i sie mangonggọu kaěng si sire su tempone.

46Kariangkamang su ěllang ene kamageng kawal᷊ikangu mawune, kụ i sie kahombangengbe kapẹ̌koạe munarane.

47Pangimangke, u mawune sarung manarakangu kal᷊awọu rarotonge su ěllang ene.

48Kai kereu ěllang ene kawe ral᷊akị ute, i sie sarung mẹ̌bera su ral᷊ungu naunge,

49'Mawuku bědaweng marěngụ mẹ̌bal᷊ị,' kụ i sie nanětạe namal᷊ọ manga ěllang bal᷊ine, mase kimaěng nanginung dingangu tahapẹ̌těngkiwukang.

50Bọu e mawune sarung mẹ̌bal᷊i su ěllo ringangu orase ta l᷊aantiwange.

51Tangu ěllang ene sarung bẹ̌bawẹ̌bahengu mawune, kụ iwahung sol᷊ong tampạu taumata mělle. I sire sarung mahunsangị dingangu mẹ̌tatahangu sigěsạ paịse."


  Share Facebook  |  Share Twitter

 <<  Matius 24 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran