Alkitab Mobile SABDA
[VER] : [SIMALUNGUN]     [PL]  [PB] 
 <<  Bilangan 28 >> 

Titah Pasal Galangan; 1. Pasal Galangan Ari-ari

1Dob ai nini Jahowa ma hubani si Musa,

2“Padas ma tonah-Ku bani halak Israel, anjaha hatahon ma hubani sidea, ʻIa galangan Bangku, songon sipanganon Bangku, ai ma galangan apuy, uap na misbou Bangku; maningon paruhurhononmu do in, ase igalangkon Bangku bani panorang na dob binuhul hinan.ʼ

3Anjaha hatahon ma hubani sidea, ʻOn do galangan apuy na maningon galangonkon bani Jahowa: Dua anak ni biribiri na marumur satahun na so martikas, ganup ari, bahen galangan situtungon na manongtong.ʼ

4Biribiri na sada maningon sogod galangkononmu, anjaha biribiri na sada nari maningon bodari galangkononmu;

5sonai homa saparsapuluh efa itak na lumat bahen galangan sipanganon, na niagu pakon minak saparompat hin, na giniling humbani buah ni jetun.

6In ma galangan situtungon na manongtong, na dob tinaktakkon i Dolog Sinai bahen galangan apuy, uap na misbou bani Jahowa.

7Anjaha galangan siinumon na mardomu hujai, saparompat hin bani ganup anak ni biribiri; maningon bani ianan na pansing ai do useihononmu galangan siinumon humbani anggur bani Jahowa.

8Anggo anak ni biribiri na sada nari ai, maningon galangkononmu do ai malele bod ari; songon galangan sipanganon sogod rap pakon galangan siinumonni maningon galangkononmu do ai songon galangan apuy, uap na misbou bani Jahowa.”

2. Galangan Ari Sabat pakon Galangan bani Poltak ni Bulan

9Tapi anggo bani ari Sabat maningon dua anak ni biribiri na marumur satahun anjaha na so martikas, pakon dua parsapuluh itak na lumat bahen galangan sipanganon, na niagu pakon minak pakon galangan siinumonni.

10In ma galangan situtungon bani ganup ari Sabat, tambah ni galangan situtungon na manongtong pakon galangan siinumonni.

11Anjaha bani bona ni ganup bulan, maningon galangkononmu do sada galangan situtungon bani Jahowa: Dua anak ni lombu, sada biribiri tunggal, pitu anak ni biribiri na marumur satahun, na so martikas;

12sonai homa tolu parsapuluh itak na lumat bahen galangan sipanganon, na niagu pakon minak, hasoman ni ganup anak ni lombu ai; anjaha dua parsapuluh itak na lumat bahen galangan sipanganon, na niagu pakon minak, hasoman ni ganup biribiri tunggal;

13anjaha saparsapuluh itak na lumat bahen galangan sipanganon, na niagu pakon minak, antup ni ganup anak ni biribiri ai, bahen galangan situtungon, uap na misbou, sada galangan apuy bani Jahowa.

14Galangan siinumonni ai ma satongah hin anggur antup ni ganup anak ni lombu, anjaha sapartolu hin antup ni ganup biribiri tunggal, anjaha saparompat hin antup ni ganup biribiri. Ai ma galangan situtungon bani ganup poltak ni bulan manipat satahun.

15Ambah ni ai galangonkon do sada hambing tunggal bahen galangan pardousaon bani Jahowa sobali galangan situtungon na manongtong, rap pakon galangan siinumonni.

3. Galangan Sanggah Paskah

16Tapi bani ari sapuluh ompat bulan sada, ijai ma pamasaon Paskah bani Jahowa.

17Anjaha bani ari sapuluh lima bulan ai masa ma ari raya; pitu ari dokahni maningon panganon ruti na so niigaran.

18Bani ari na parlobei ma pamasaon partumpuan na mapansing; seng bulih horjahononnima barang aha horja ari-ari ijai,

19tapi maningon galangkononnima do galangan apuy bahen galangan situtungon bani Jahowa: Dua anak ni lombu, sada biribiri tunggal pakon pitu anak ni biribiri na marumur satahun, sagala na so martikas;

20rap pakon galangan sipanganonni humbani itak na lumat, na niagu pakon minak; maningon galangkononmu tolu parsapuluh efa antup ni ganup anak ni lombu ai, anjaha dua parsapuluh antup ni ganup biribiri tunggal;

21saparsapuluh galangkononmu antup ni ganup anak ni biribiri na pitu ai,

22sonai homa sada hambing tunggal bahen galangan pardousaon mambahen pardearan bennima.

23Maningon galangkononnima do ai sobali galangan situtungon sogod; galangan situtungon na manongtong do ai.

24Romban hujai maningon galangkononnima ari-ari, ibagas na pitu ari ai, ruti bahen galangan apuy, uap na misbou bani Jahowa; tambah ni galangan na manongtong rap pakon galangan siinumonni.

25Anggo bani ari papituhon ai, maningon pamasaonnima do tumpuan na mapansing bennima; seng bulih horjahononnima barang aha horja ari-ari ijai.

4. Galangan Sanggah Pentakosta

26Sonai homa bani ari limbuah, anggo igalangkon hanima galangan sipanganon na bayu bani Jahowa, bani pesta minggunima, maningon pamasaonnima do sada tumpuan na mapansing bannima; seng bulih horjahononnima barang aha horja ari-ari ijai.

27Maningon galangkononnima do ijai dua anak ni lombu, sada biribiri tunggal, pitu anak ni biribiri na marumur satahun bahen galangan situtungon, uap na misbou bani Jahowa,

28sonai homa itak na lumat, na niagu pakon minak bahen galangan sipanganon, tolu parsapuluh efa antup ni ganup anak ni lombu, dua parsapuluh antup ni ganup biribiri tunggal,

29anjaha saparsapuluh antup ni ganup anak ni biribiri na pitu ai;

30rap pakon sada hambing tunggal bahen pardearan bennima.

31Maningon galangkononnima do ganupan ai sobali galangan situtungon na manongtong pakon galangan sipanganonni; maningon na so martikas do ai rap pakon galangan siinumonni.”


  Share Facebook  |  Share Twitter

 <<  Bilangan 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran