Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 20 >> 

Titah na Sapuluh in

1Dob ai ihatahon Naibata ma ganup hata on, nini ma,

2“Ahu do Jahowa Naibatamu, na paluarhon ho hun tanoh Masir, hun rumah parjabolonanmu.

3Lang malo ho marnaibata na legan i lobei ni bohing-Ku.

4Lang malo bahenonmu bam gana-gana, barang suman-suman aha pe na i babou i nagori atas, age na i toruh ibagas tanoh ronsi na ibagas bah i toruh ni tanoh.

5Lang malo sombahonmu in atap balosanmu, ai Ahu do Jahowa Naibatamu. Naibata parsimburu, na mambalaskon hajahaton ni bapa hubani anakni ronsi sundut patoluhon pakon paompatkon, sagala na marsogam ni uhur Bangku.

6Tapi maidop do uhur-Hu bani na marribu-ribu, na mangkaholongi Ahu, na mangkorjahon titah-Kin.

7Lang malo sobutonmu goran ni Jahowa Naibatamu ibagas hampung ni uhur, ai seng apitan ni Jahowa barang ise na manobut goran-Ni ibagas hampung ni uhur.

8Ingat ma papansingkon ari Sabat (parsaranan) in.

9Onom ari ma ho marhorja anjaha mangkorjahon sagala horjamu,

10tapi anggo ari papituhon in ari parsaranan ni Jahowa Naibatamu do in. Lang malo bahenonmu ijin age horja aha pe, ho atap anakmu, atap borumu, atap jabolonmu dalahi, atap jabolonmu naboru, ronsi pinahanmu atap halak na legan na ibagas hutamu.

11Ai ibagas na onom ari do itompa Jahowa langit pakon tanoh pakon laut ampa haganup isini, dob ai marsaran ma Ia bani ari papituhon ai. Halani ai do ase ipasu-pasu Jahowa ari parsaranan-Ni ai anjaha ipapansing.

12Maningon pasangaponmu do namatorasmu, ase dokah ho manggoluh i tanoh na binerehon ni Jahowa bam.

13Ulang ho mamunuh.

14Ulang ho marbangkis.

15Ulang ho manangko.

16Ulang ho ra manaksihon ladung dompak hasomanmu.

17Lang malo uhur-uhuranmu rumah ni hasomanmu, lang malo uhur-uhuranmu urang rumah ni hasomanmu, barang jabolonni dalahi barang jabolonni naboru, barang lombuni, barang halodeni atap aha pe ugas ni hasomanmu.”

Biar ni Bangsa ai

18Jadi dob ididah bangsa ai longgur, hilap, sora ni tarompit pakon dolog na martimus ai, mabiar anjaha gobir ma bangsa ai, gabe mandaoh-daoh ma sidea jongjong.

19Nini sidea ma dompak si Musa, “Ham ma hasomannami marsahap, itangihon hanami pe; tapi ulang ma Naibata marsahap dompak hanami, ase ulang matei hanami.”

20Tapi nini si Musa ma dompak bangsa ai, “Ulang nasiam mabiar, ai na manlajou nasiam do ase roh Naibata, ase marhabiaran nasiam hu Bani, ase ulang mardousa nasiam.”

21Jadi mandaoh-daoh ma bangsa ai jongjong; tapi anggo si Musa iparayak do na golap ai, ijai do Naibata.

Titah Pasal Anjapanjap

22Dob ai nini Jahowa ma dompak si Musa, “Sonon ma hatahon hubani halak Israel, ʻDomma ididah hanima na Huparsahapkon in hanima hun nagori atas.

23Lang malo bahenonmu angkup-Ku, naibata pirak atap naibata omas, lang malo bahenonmu in bannima.

24Bahen ma Bangku sada anjapanjap humbani tanoh, anjaha ijai ma galangkononmu galangan situtungonmu, galangan pardameianmu, biribirimu pakon lombumu; bani sagala ianan na Hupasuk bahen pardingatan bani goran-Ku, hujai do parayakon-Ku ho anjaha pasu-pasuon-Ku ho.

25Tapi anggo sihol bahenonmu Bangku sada anjapanjap humbani batu, ulang humbani batu na binarbar pauli, ai anggo mangonai bosimu hujai gabe butak ma ai.

26Anjaha ulang ho marandar naik hu anjapanjap-Kin, ase ulang taridah niabitanmu i atasni.ʼ”


  Share Facebook  |  Share Twitter

 <<  Keluaran 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran