Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 4 >> 

Hata Sidalian ni si Musa Mangengkar Parsuruh ni Naibata; Tanda Halongangan Sibahenonni Marhatongonkon Parsuruh ni Naibata

1Dob ai nini si Musa ma mambalosi, “Tapi tonggor Ham ma, seng haporsayaan ni sidea ahu anjaha seng tangihonon ni sidea sorangku, tapi hatahonon ni sidea do, ʻSeng taridah Jahowa bam!ʼ”

2Nini Jahowa ma dompaksi, “Aha do na i tanganmin?” Balosni, “Tungkot.”

3Dob ai nini ma, “Gijigkon ma in hu tanoh!” Jadi igijigkon ma ai hu tanoh, lanjar gabe ulog ma; pala lintun si Musa hun lobeini.

4Tapi nini Jahowa ma dompak si Musa, “Surdukkon ma tanganmu anjaha tangkap ma ihurni.” Jadi isurdukkon ma tanganni, itangkap ma anjaha gabe tungkot ma ai i tanganni,

5ase porsaya sidea na dob taridah bam Jahowa Naibata ni ompung ni sidea, Naibata ni si Abraham, Naibata ni si Isak pakon Naibata ni si Jakob.

6Ambah ni ai nini Jahowa ope dompaksi, “Surukkon ma tanganmu hubagas bajumin.” Jadi isurukkon ma tanganni hubagas bajuni; sanggah itarik ai, tonggor ma, domma gadamon tanganni ai, malopak songon salju.

7Dob ai nini ma use, “Ulaki ma surukkon tanganmin hubagas bajumin. Jadi iulakkon ma manurukkon tanganni ai hubagas bajuni; sanggah itarik ai, tonggor ma, domma mulak dear songon dagingni hinan.

8“Anggo lang porsaya sidea bam, anjaha lang itangihon sora ni tanda na parlobei in, sai na porsaya do sidea bahenon ni sora ni tanda na paduahon in.

9Tapi anggo lang itangihon age tanda na dua on, anjaha lang itangihon soramu, buat ma bah hun Nil ai, anjaha useihon ma ai hu tanoh na horah; jadi gabe daroh ma bah na binuatmai hun Bah Nil ai i tanoh na horah ai.”

10Tapi nini si Musa ma dompak Jahowa, “Ham Tuhanku, seng halak parsahap-sahap ahu, age i lobei ni on, age olat ni na dob marsahap Ham dompak ahu jabolonmu on; ai borat do pamanganku pakon dilahku.”

11Dob ai nini Jahowa ma dompaksi, “Ise do na mambahen pamangan ni jolma? Ise do na mambahen ia longah, nengel, marpangidah atap pitung? Ai lang Ahu, Jahowa do?

12On pe, laho ma ho, Ahu pe mangkasomani pamanganmu anjaha mangajari ho atap aha sihatahononmu.”

13Tapi nini ma, “Ham Tuhan, suruh Ham ma atap ise na legan.”

14Jadi manringis tumang ma Jahowa dompak si Musa, nini ma, “Ai lang saninamu do si Aron, halak Levi ai? Hubotoh na pandei do ia marsahap; tonggor ma homa, domma roh ia marjumpahkon ho, anjaha malas ma uhurni ibagas anggo ididah ho.

15Parsahapkon ma ia anjaha nahkon ma ganup hata ai hu pamanganni; Huhasomani pe pamanganmu ampa pamanganni anjaha Huajari pe hanima atap aha sibahenonnima.

16Ia pe gantihmu marsahap hubani bangsa ai, ia ma songon pamangan bam anjaha ho songon Naibata bani.

17Boan ma tungkot in ibagas tanganmu, parhiteianmu mambahen sagala tanda ai.”

Parmulak ni si Musa hu Tanoh Masir

18Dob ai laho ma si Musa mulak hubani si Jetro, tulangni ai, nini ma hu bani, “Mahua lopas ham ma ahu laho mulak hubani saninangku na i tanoh Masir, ase huidah atap na manggoluh ope sidea.” nini si Jetro ma, “Laho ma ho ibagas damei.”

19Dob ai nini Jahowa ma dompak si Musa i Midian, “Laho ma ho mulak hu Masir, ai domma matei ganup halak na mantahihon hosahmu.”

20Dob ai iboan si Musa ma parinangonni pakon anakni, ipahundul ma sidea hubani sada halode, jadi mulak ma ia hu tanoh Masir. Iboan do homa tungkot ni Naibata ai ibagas tanganni.

21Nini Jahowa ma dompak si Musa, “Anggo mulak ho hu tanoh Masir, ingat ma mambahen ganup halongangan na Huondoskon in hubagas tanganmu i lobei ni Parao. Tapi pahengkengon-Ku do uhurni ase ulang ilopas bangsa ai laho.

22Anjaha hatahon ma dompak Parao, Sonon do hata ni Jahowa, “Anak-Ku sikahanan do Israel,

23halani ai Huhatahon ma bam, lopas ma anak-Ku laho ase ipasangap Ahu. Anggo mangengkar ho palopaskonsi laho, tonggor ma, bunuhon-Ku ma bunga tubuhmu.”

24Tapi i tongah dalan sanggah ibagas sada rumah parbornginan ia, ijumpahkon Jahowa ma ia sihol mambunuhsi.

25Jadi ibuat si Zippora ma sada batu na marot, isunat ma sibur-sibur ni anakni, igiut ma nahei ni si Musa marhitei ai anjaha nini ma, “Siparunjuk daroh do ho bangku.”

26Jadi ipaluah Jahowa ma ia. Ihatahon pe ijia “Siparunjuk daroh”, halani parsunaton ai do.

27Dob ai nini Jahowa ma dompak si Aron, “Laho ma ho manjumpahkon si Musa hu halimisan.” Jadi laho ma ia, gabe jumpahsi ma ia i Dolog ni Jahowa anjaha isummah ma ia.

28Ipatugah si Musa ma hubani si Aron haganup hata ni Jahowa na hinatahonni, pakon haganup tanda na tinonahkon-Ni bani.

29Dob ai laho ma si Musa pakon si Aron, ipatumpu sidea ma ganup partua-partua ni halak Israel.

30Ipatugah si Aron ma haganup hata ai, na hinatahon ni Jahowa dompak si Musa, anjaha ibahen ma ganup tanda ai i lobei ni bangsa ai.

31Jadi porsaya ma bangsa ai; anjaha dob ibogei sidea, na dob iparayak Jahowa halak Israel anjaha itatap hamarsikonni, mangunduk bei ma sidea anjaha manrogop.


  Share Facebook  |  Share Twitter

 <<  Keluaran 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel