Alkitab Mobile SABDA
[VER] : [SIMALUNGUN]     [PL]  [PB] 
 <<  Yesaya 59 >> 

Dousa ni Bangsa ai do Mangambat Haluahon na humbani Jahowa bani Sidea

1Tonggor ma, seng na hurang ganjang tangan ni Jahowa laho mangurupi, anjaha seng marhapal pinggol-Ni laho manangihon;

2tapi hajahatonnima do tene manirang hanima humbani Naibatanima, anjaha dousanima mambahen lingod bohi-Ni hu bannima, gabe seng itangihon hanima.

3Ai marsapu daroh do tangannima anjaha marlapu hajahaton jari-jarinima; bibirnima mangkatahon ladung, anjaha gok hajahaton do dilahnima.

4Sahalak pe lang dong be na mansahapkon hapintoron, anjaha seng dong be na manguhum ibagas hasintongan; bani na lang do sidea marhatengeran, anjaha ladung do iluarhon; boratan rumah do sidea marhitei hajahaton, anjaha hamagouan do itubuhkon.

5Tolur ni ulog darih do ipodomkon sidea, anjaha asar ni lawah-lawah ipauli; ise na mangankon tolur ni sidea, maningon matei do, anjaha humbani tolur na hona dogei luar ulog darih.

6Na tinonun ni sidea ai seng marguna gabe hiou, anjaha seng tarbahen jadi sabing na hinorjahon ni sidea. Horja hajahaton do horja ni sidea, anjaha pangodoh-odohon do horja ni tangan ni sidea.

7Podas do nahei ni sidea mangkorjahon hajahaton, anjaha tarolos do sidea manduruskon daroh na so marpipot; uhur hajahaton do uhur ni sidea, na parsedahon ampa na mangagou dalan ni sidea.

8Dalan hadameion seng itanda sidea, seng dong habonaron bani dalan ni sidea; mareluk-eluk do dalanni ibahen sidea, sagala na mardalan ijai seng marhasonangan.

9Halani ai do ase daoh habonaron hun banta, anjaha seng roh hapintoron banta. Mangarap do hita bani haliharon, hape na golap do, atap bani sinalsal, hape bani na lotir do hita mardalan.

10Dadap-dadap do hita bani dingding songon halak na mapitung, anjaha jamah-jamah songon halak na so marmata. Mangkatartolsu hita arian songon bani golap ni ari, anjaha songon na matei do hita bani hagogohon ni angkulanta.

11Ganup do hita morong songon gipul, anjaha marduhur-duhur songon asas; sai paima-imahon do hita bani habonaron, hape seng dong; paima-imahon do hita bani haluahon, hape daoh do hun banta.

12Ai buei do panlanggaronnami i lobei-Mu, anjaha dousanami do mangaduhon hanami; talar do bennami panlanggaronnami, anjaha ibotoh hanami do hajahatonnami.

13Marbalik anjaha marnalangkon Jahowa do hanami anjaha itundali hanami do Naibatanami; mansahapkon pangodoh-odohon do hanami ampa parbalikon; iluarhon hanami do hata ladung humbagas uhurnami.

14Surut do dompak pudi habonaron, anjaha mandaoh-daoh do hapintoron jongjong.

15Seng jumpah be hasintongan, anjaha barang ise na paholang dirini humbani hajahaton, gabe sirampokan ma. ididah Jahowa do ai, gabe seda uhur-Ni, halani seng dong be habonaron.

16Anjaha ididah, seng dong jolma na boi paluahkon; longang do uhur-Ni halani seng dong na mangapiti; jadi tangan-Ni sandiri ma na manumpaki-Si, anjaha hapintoron-Ni na mangurupi-Si.

17Ipakei hapintoron songon baju partahanan, anjaha inahkon tangkuluk haluahon bani ulu-Ni; hiou pambalason do ipahei, anjaha ihioui diri-Ni bani baju-baju parsimburuon.

18Romban hubani pambahenan do Ia mambalas: ringis hu bani imbang-Ni, pambalason bani munsuh-Ni; bani pulou-pulou pe dalankonon-Ni do pambalason.

19Jadi habiaran ni halak na i hasundutan ma goran ni Jahowa, ampa halak na i hapoltakan mabiar do bani hamuliaon-Ni, ai roh do Ia songon bah marbanggal na doras, ai ma na jinuljul ni hosah ni Jahowa.

20Jadi roh ma hu Sion Sipaluah, sonai bani halak na i Jakob, na mulak humbani hajahaton, nini Jahowa.

21Tapi anggo Ahu, on do padan-Ku bani sidea, nini Jahowa, “Tonduy-Hu, na sorap bam ampa hatang-Ku, na dob Hunahkon bani pamanganmu, seng boi morot ai humbani pamanganmu, age humbani pamangan ni ginomparmu, age humbani pamangan ni ginompar ni ginomparmu, nini Jahowa, humbani sonari nari ronsi sadokah ni dokahni.”


  Share Facebook  |  Share Twitter

 <<  Yesaya 59 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran