Alkitab Mobile SABDA
[VER] : [TORAJA]     [PL]  [PB] 
 <<  Pengkhotbah 3 >> 

Mintu’ apa lan te lino den nasang attunna

1Iatu mintu’ apa den attunna sia iatu apa la dadi nasambo langi’ den nasang allona.

2Den tu attu kakianakan sia den tu attu kamatean, den tu attu mantanan sia den tu attu manglampi’.

3Den tu attu papatean sia den tu attu ma’pamondo, den tu attu mangrondon sia den tu attu ma’pate’dek.

4Den tu attu katumangiran sia den tu attu kametaan, den tu attu dinii umbating sia den tu attu dinii ma’gellu’.

5Den tu attu dinii untibean batu sia den tu attu dinii urrampun batu, den tu attu dinii mangraka’ sia den tu attu dinii umpatoyang kale dio mai mangraka’.

6Den tu attu dinii mandaka’ sia den tu attu dinii ma’pa’dean, den tu attu dinii manganna sia den tu attu dinii massuale.

7Den tu attu dinii masserek sia den tu attu dinii mandasi’, den tu attu dinii ma’pakappa sia den tu attu dinii ma’ulelean.

8Den tu attu dinii ma’pakaboro’ sia den tu attu dinii ungkabiri’ tau, den tu attu parari sia den tu attu kasitaman.

9Apara napolean tu to mengkarang dio mai tu apa nakara’ta’i?

10Kupemarangamo tu pengkarangan Nasorong Puang Matua lako mintu’ ma’rupa tau kumua anna mara’ta’ ungkarangi.

11Mangkamo Napadadi melo tu mintu’na lan attunna sia Napatama duka lan penaanna tolino tu pa’tangngaran diona apa situran-turan tempon dio mai, apa moi misa’ tae’ natandai tolino tu diona pengkarangan Nakarang Puang Matua dio mai pamulanna sae lako ma’katampakanna.

12Kutandaimo, kumua tae’ na tolino ungkuasai tu iannato, apa iake parannui sia umpasannang kalena lan mintu’ allo katuoanna,

13kondi’na, kumua ke denni tau kumande sia mangiru’ sia umperasai melona dio mai mintu’na kamara’tasanna, iamoto tu pa’kamaseNa Puang Matua.

14Kutandaimo, kumua iatu mintu’ pengkaranganNa Puang Matua, matontongan; tae’ tau ma’din urrangnganni ba’tu unnalai; sia Napogau’ Puang Matua tu iannato, kumua anna mataku’ tu tau dio oloNa.

15Mintu’na tu apa den totemo, inang den dolomo, sia iatu apa la den inang den dukamo dolona; sia Natuntun pole’ Puang Matua tu apa lendu’mo.

Buda kakelokan dadi dao kuli’na padang

16Den siapa kutiro tu inan pa’paolaian salu lan naarrang matanna allo: inde to nanii kakelokan; sia iatu inan nanii kamaloloan; inde to nanii katangmalamburan.

17Sipa’kadamo’ kaleku kukua: Puang Matua la umpaolai salu to malambu’ sia to tang malambu’, belanna iatu mintu’ apa sia mintu’ pengkarangan pantan den attunna.

18Sipa’kadamo’ kaleku kukua: Iatu diona ma’rupa tau la Nata’piimo Puang Matua sia la Napasomboammo, kumua iatu a’ganna susi bang olo’-olo’.

19Belanna iatu lampakna ma’rupa tau susi bangsia lampakna olo’-olo’, ondongpi misa’ lampakri sola duai: susitu olo’-olo’ mate, susi dukato tu ma’rupa tau mate, sia sangrupari tu napopenaa sola nasang, tae’ tu losongna tolino na olo’-olo’; belanna iatu mintu’nato tae’ gai’na.

20Iatu mintu’nato misa’ri inan nakarampoi, sia mintu’nato lu dio nasangi mai litak sia la sule pole’ lako litak.

21Mindara untiroi tu penaanna ma’rupa tau kendek langngan anna iatu penaanna olo’-olo’ ma’palurokko mangapi’na tana?

22Iamoto kutandaimo kumua tae’ ia losong melona, sangadinna iatu tolino umposende mintu’ pengkaranganna, belanna iamoto tu taana belanna mindara la umpatunduk tolino la umpoparannui tu apa la dadi, ke matemi.


  Share Facebook  |  Share Twitter

 <<  Pengkhotbah 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran