Dual PanelTo Israel dirampanan dio mai kuasa lino
1Attu ia dukato iatu PUANG la umpapakkanni pa’dang bassi barani, kapua sia matoto’Na tu Lewiatan, ula’ mandirri’, tu Lewiatan ula’ tikolik len sia la Napatei tu naga lan tasik.
2Attu ia dukato la den tu pa’lak anggoro’, pambura-bura uai anggoro’na; la sibali-balikomi umpassengoanni.
3Akumo PUANG, tu pakaduttu’na, la ussakka’i nenne’i; la Kupetayanni keallo kebongi, da narumbu lenni kakadakean lako.
4Tae’mo anna kabu’Na’ kasengkean; umba-umba Kunii ungkabu’tui duri sia a’da’, Kulaoi, angKu purai nasangi Kuballa.
5– Sangadinna ke napentoei tu pa’rinding pala’Ku, sia ke sikadamakNa’, ke sikadamakNa’.
6Iake attu undinna la mennuaka’ tu Yakub, sia la menta’bi na mentado’ tu Israel, naurunganni situtu’ burana tu lino.
7Napata’pairaka lima tu tau iato mai susitu to mangka umpata’pai lima? Ba’tu dipongkoraka tu tau susi kadipongkoanna to dipongko dio lu ualinna?
8Miea tu tau iato mai diona kadiula’ina sia kadisuale-palaranna: Nabaamo angin bara’Na Puang, tonna liu bara’ matallo.
9Iamoto anna dipa’dei tu salana Yakub sia iamote tu mintu’ buanna kadiseroianna kasalanna, kumua iatu mintu’ batu pa’paisungan nanisak-nisak susi susu batu, naurunganni tae’mo te’dek tu mai lentong dipodeata sia inan pemalaran dinii untunu dupa.
10Belanna tondok ditambakuku iato daun lauan sia mentondok talo sia disitampei sangtinti padang aak; la nanii anak sapi undaka’ kande sia nanii ma’pasang, anna pepurai tu mai ranga’-ranga’na.
11Ianna marangkemo tu mai tangkena, direbong-rebongmi, anna sae tu mai baine umballai; belanna inang tae’ inaanna te bangsa iate, iamoto anna tae’ Nakatirinnai To pagaraganna sia tae’ anNa katuru-turui To kumombongna.
12Attu iato la manglullu’ tu PUANG randuk dio mai Salu kapua landa’ lako salu Mesir; apa iatu kamu e to Israel, la Naruruk simisa’komi.
13Sia attu ia dukato, la den tu napiri tanduk la dipannoni, anna sae nasang tu tau iato mai, tu tisambo’ lako tana Asyur sia tu diula’i lako Mesir la sae sola nasangi tukku umpenombai PUANG dao buntu maindan dio Yerusalem.