Dual PanelTo Israel ullamban Yordan
1Melambi’mi millik tu Yosua, anna ke’de’ sola mintu’ to Israel dio mai Sitim, narampo lako Yordan, anna ma’bongi dio tu tau iato mai, namane lamban.
2Iatonna upu’mo tallung allo, malemi tu mai pangulu lu lako lu dio mai lan lu to’ tenda,
3nasuai tu to buda, nakua: Iake mitiroi tu patti basseNa PUANG, Kapenombammi, sia mintu’ to minaa, bati’na Lewi, umbullei, la ke’de’ dukakomi dio mai inammi, ammi turu’i.
4Apa melo ke iatu kasiallarammi na patti iato agi-agi duangsa’bu siku; da mimareke’ lako; ammi tandai tu lalan, tu sipatu la miolai, belanna tae’pa miola lenni tu lalan iato la iongi’ la duangbongi’.
5Nakuami Yosua lako tu to buda: Pamaserokomi kalemi, belanna masiang la umpogau’ tanda kalle-kallean tu PUANG dio lu kamu.
6Ma’kadami tu Yosua lako mintu’ to minaa, nakua: Angka’i tu patti basse, ammi lumingka undoloan to buda. Naangka’mi tu patti basse, anna lumingka undoloan to buda.
7Ma’kadami tu PUANG lako Yosua, Nakua: Allo iate Kuranduk umpatarompo’ko dio pentirona mintu’ to Israel, anna issanni, kumua: Susitu Musa mangka Kurondong, susi dukato Aku la urrondongko.
8La mupa’parentan lako mintu’ to minaa tu umbulle patti basse kumua: Iake rampomokomi lako randanan Yordan, torrokomi bendan lan Yordan.
9Nakuami Yosua lako mintu’ to Israel: Mengkareke’komi mai ammi perangii tu kadanNa PUANG, Kapenombammi.
10Sia ma’kadapa tu Yosua nakua: Indeto la minii untandai kumua den tu Puang Matua matontongan lan lu tangngami sia manassa Iamo la urrambai tu to Kanaan, to Het, to Hewi, to Feris, to Girgasi, to Amori na to Yebus dio mai tingayomi.
11Manassa iatu patti basseNa Puangna mintu’ ma’dandan maritik dao kuli’na padang la ullamban Yordan undoloangkomi.
12Iamoto la miala tu sangpulo dua muane dio mai mintu’ suku Israel, misa’ muane, ke misa’oi suku.
13Iake mellesemi lan to’ uai Yordan tu pala’ lette’na mintu’ to minaa tu umbulle patti PUANG, Iamo Puangna mintu’ ma’dandan maritik dao kuli’na padang, tipa’duami tu uai Yordan; na iatu uai lolong daa mai ulunna la tadang butung to misa’ panampo.
14Iatonna ke’de’mo dio mai to’ tendana tu bangsa iato la ullamban Yordan, malemi tu to minaa tu umbulle patti basse undoloanni tu to buda.
15Iatonna rampomo tu to umbulle patti lako Yordan sia iatonna mellesemo tu lette’na mintu’ to minaa umbullei tu patti rokko uai – iatu Yordan saba’mo lako biringna lan mintu’ allo pegandungan –,
16pakalan tadangmi tu uai lolong daa mai ulunna sia bendan butung to misa’ panampo, mambela tongan sae lako Adam, iamotu kota sisa’de Sartan, na iatu uai lolong lako tasik dio Araba, iamotu tasik Ma’sin, dipasisarak uai daanna lu. Lambanmi tu bangsa iato sipatu tondok Yerikho.
17Apa iatu mintu’ to minaa, tu umbulle patti basseNa PUANG, bendan bantang dio to’ karangkeanna lan tangnga Yordan, anna tongke lamban tu mintu’ to Israel dio to’ karangkeanna sae lako tappunna tu mintu’ bangsa iato ullamban Yordan.