Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 13 >> 

1Ye gato onyar kem mo Yefun Yesus mo kota Antiokhia, án sum petok sor. Ye gato gum yenabi si yeguru ge at si án sum sino mone. Ye ka at ne gum do, Barnabas e, Simeon gato ye kendo do Ye te e, Lukius gato ma kadit Kirene e, Menahem gato ye kon si yeraja Herodes sino e, si Saulus.

2Ye gato onyar kem mo Yefun Yesus mo kota Antiokhia sum wa som Yefun Allah. Án mewa án nggwa kadit sugit yei subere án ki suk su Yefun. Án ki suk su Yefun saresa, Yefun Allah Gen ki nai án do, "Nin bes Barnabas si Saulus wa an we ben suk gato Ji iwa an we ben ne et."

3Sane yé gato onyar kem mo Yefun Yesus mo Antiokhia mewa án nggwa kadit sugit yei, án ki suk su Yefun. Orge án ak án syim mo Barnabas si Saulus, tepsu án syo Yefun Allah bi suktinggi nai ye we, ete án syogat ye we mu ki sukdu subot os ndo gato Yesus Kristus kak wa men yetu ne nai ye yi neya jam.

4Yefun Allah Gen bes ye we wa mu ki sukdu subot Yesus Kristus, sane ye we mu mo kota Seleukia. Kadit ne o, ye we simo kapal dik yo mu mo ef Siprus.

5Ye we mu kom mo kota Salamis sa, ye we kibot Yefun Allah bi sukdu subot Yesus Kristus mo ye Yahudi bi nu ari mone. Yohanes ós ye we bot os ne dom.

6Ye we ne mubot ef Siprus ne sor, ye we mu kom mo kota Pafos. Mone ye we ku ye Yahudi ge dik yo gato gum do Bar Yesus. An yewon, an kidar nje do, an yenabi.

7An si yenggras Gubernur mo ef ne tepsu yedik. Yenggras Gubernur gum do, Sergius Paulus. Yenggras ne sa, jam suk mwa. Sane yenggras syogat ye mu kar Barnabas si Saulus ma, we an iwa an jam Yefun Allah bi sukdu subot Yesus Kristus.

8Sarewo Bar Yesus, yewon gane, an duwer Barnabas si Saulus. Su a Yunani yé kendo yewon ne gum do Elimas. Sane Elimas meret os wa an we subere yenggras Gubernur ne yo jammo sukdu gato ye we ki ne nde. Elimas werwa subere yenggras Gubernur ne yo onyar kem mo Yefun Yesus nde.

9Sarewo Saulus gato ye kendo gum dik yo o do Paulus, Yefun Allah Gen bok nggwa mo an, orge Paulus sokwa Elimas, an ki do,

10"Nan anato biris bi yekwesu bi pa-i, nan duwer nje mo suk mwa gato ndo ne bu. Nan kidar suk nggi, nan ki suk nan brek nden we. Yefun Allah bi sukdu ne sangge, wo nan ki do, sukdu ne ye kidar kaii, nan ki do, sukdu ne yo sangge nde. Yefun fro os ndo wa men yetu, sarewo nan duyawa os ne bu wa suma ne?

11Sane su ré, Yefun Allah ben sukye nai nan it. Ré ne, Yefun Allah ben nan gro ndu yei, nan yo me suk sisu ndo o nde yei." Sugane it, Elimas jam suk yo kewa an gro, sane an gro ndu it. An yo me suk sisu ndo o nde. An meret nje wa ós jom an syim wa top an mu mo pe gato an iwa an mu mone.

12Yenggras Gubernur me suk gato bor mo Elimas ne sa, yenggras ne yeket sukdu subot Yesus Kristus, an yeket Yefun Allah bi suktinggi gato bor mo Elimas. Sane yenggras ne nai sukjimnut dik do, an brek kadit os nyim, ete an jammo Yefun Yesus tepsu an bi Yekwesu, an onyar kem mo Yefun Yesus it.

13Paulus si yé bok yo gato simo an mu kadit kota Pafos. Án sino it mo kapal mu mo kota Perga mo bur Pamfilia. Mone Yohanes, gato ye kendo gum do, Markus mu kadit yé bok ne. Yohanes satu mu mo Yerusalem.

14Orge Paulus si an bi yesyim mu ne mu mo kota Antiokhia mo bur Pisidia. Paulus si an bi yesyim mu kom motu, orge kam Sabat, ye Yahudi bi kam sye, án sok mo ye Yahudi bi nu ari. Án kem ga mo nu ari mit ne.

15Mo nu ari ne, ye baca sukdu mo Musa si yenabi bok yo o bi buku, orge yekwesu mo nu ari ne syogat ye mu ki sukdu nai Paulus si bi yesyim ne do, "Ji bi nji, nin bi sukduno yo wa ós men more it yo, nin ki mó et."

16Sane Paulus ti, an bes an syim subere yé not ete jam suk gato an ki ne, orete an ki do, "Ji bi nji, ye Israel sisu yewis yi gato nyuwa Yefun Allah. Nin jammo suk gato ji ki ré et.

17Yefun Allah gato jom men ye Israel ne, An bes men bi amui tepsu An dakai bi nje-i kadit yewis yi. Tomgatu men bi amui kem tepsu yemabe mo bur Mesir, Yefun Allah ben sukndo su men bi amui sane sor men bi yewis-i ne mwa wai o re. Tomgato Yefun Allah gwat men bi amui syesyar kadit bur Mesir, An bi suktinggi gato nggi wai o re, bor mone.

18Men bi amui da ben sukibit mwa mo pe gato kwe yo kom mo nde, sarewo Yefun Allah yo misyar án nde, wo Yefun mewa án sor, kom mo tahun musyu at.

19Yefun Allah gu yewis yi mufit mo bur Kanaan wé, orge Yefun Allah syo bur ne nai men bi amui tepsu án dakai bi bur-i.

20Kadit kam gato men bi amui mu kem mo bur Mesir sor kom mo kam gato án mu kem mo bur Kanaan ne tepsu tahun wotin at musyu mek." "Men bi amui mu kem mo bur Kanaan, or Yefun Allah bes yekwesu gato ye kendo do yepasye gato ndobot nje subere yepasye ne jowa men bi amui, ye Israel ne. Yepasye ne tepsu yekwesu sor kom mo kam gato Yefun Allah bes yenabi Samuel tepsu yekwesu wa ye Israel.

21Orge ye Israel ne ndekwa Yefun Allah bes yeraja dik yo tepsu yekwesu wa jowa án. Sane Yefun Allah bes Saul, Kis bi pa, kadit yewis Benyamin. Saul ne yeraja sor kom mo tahun musyu at.

22Tahun musyu at ne, orete Yefun Allah is Saul ne wé. Yefun Allah bes Daud win Saul. Yefun Allah ki subot Daud ne sare do, 'Daud, Isai bi pa ne sa, an ben suk tepsu Ji mit. Suk mwa gato Ji iwa an ben bere an ben re.'

23Yefun Allah waii bes Daud bi dat ge dik yo gum Yekwesu wa nai men ye Israel kadit sukye subere men kem ndo to kapyo mato kapyo, tepsu Yefun Allah tom su men ne. Ye ne gum do Yesus.

24Yefun Yesus ne yo ma nde tó, Yohanes gato ras nje mo syur duno ye Israel sare do, 'Nin kwet kadit sukibit gato nin ben ne et.' Yohanes ki o do, 'Nin brek kadit os ibit ne, orge nin ma mo ji, ete ji ras nin mo syur.'

25Karowa Yohanes ben bi suk-i mo bur ré or sa, an ki do, 'Nin nut do, je u anato ji ré ne? Nin nut do, ji anato Ye gato nin eswa ma ne bado? Nde re. Ji ré nde re, wo Ye ne boribot ji. Ye ne, ji iwa ben suk wa An yo, bere ji yo tepsu nde, ji gum wok teker mu bur ware. Bere ji gum yo tep wa ji sombok jamtu mo An bi sepatu dom nde.' "

26Paulus ki o do, "Ji bi nji, men yé gato bi amui mo Abraham si nin yewis yi gato som Yefun Allah, men sino anato jam suktaru gato ma kadit Yefun Allah sare do, Yefun Yesus ma mo bur ré wa kak os ndo wa men subere men kem ndo to kapyo mato kapyo.

27Sarewo ye gato kem mo Yerusalem si an bi yekwesu ne sino jam nde Yefun Allah bes Yefun Yesus kak os ndo ne wa men. Yé mwa gane da jam yenabi bi sukdu subot Yefun Yesus gato ye baca su ye Yahudi bi kam sye kam Sabat ne petok sor, sarewo yé jam nde re, wo yé syokom ye gu An kwop anato yenabi bi sukdu ne bor mone re.

28Yé da ndobot Yefun Yesus, sarewo yé yo ku sukdu kwa dik yo gato Yefun Yesus ben ibit tep wa yé gu An kwop nde. Sarewo yé top Yefun Yesus mu mo Pilatus, yé kiwa Pilatus gu An kwop wé.

29Sane yé ben sukye nai Yefun Yesus tepsu sukdu mwa gato yenabi krom ne. Yé ben sukye ne, orge yé nai An kadit kwesukwin, yé grem An mukri mo jokwak mit.

30Sarewo Yefun Allah sun An kadit sukkwop ne or re.

31Kadit ne o, kam bok yo rek, yé ku An. Yé gato sisu An kadit bur Galilea mu mo Yerusalem, yé ne ku An mó re. Su ré yé gato me Yefun Yesus su án gro ne, yé ne anato ki subot Yefun Yesus nai men ye Israel jam re.

32Sane, ré ne, men ki sukdu subot os ndo gato Yesus Kristus kak wa men subere nin jam, sare do: suk gato Yefun Allah tom su men bi amui,

33An ben wa men it. An sun Yefun Yesus kadit sukkwop, ete bes Yefun Yesus ne tepsu Ye gato ós men. Yeraja Daud krom sukdu mo Mazmur kedowe subot suk gato Yefun Allah ki nai An bi Gan, Yefun Yesus ne, sare do, 'Nan anato Ji bi Gan. Su kam ré it, Ji anato tepsu Nan bi Ai it.'

34Sangge, Yefun Allah sun Yefun Yesus kadit sukkwop it. Yefun Yesus kaim yo mbras mo nde. Ye krom sane mó re. Yefun Allah ki nai Yefun Yesus sare do, 'Sukndo gato Ji dakai fro wa Ji ben su Nan, Ji tom su yeraja Daud ne, bere Ji benbot suk mwa ne su Nan re.'

35Sane dom, Daud ki nai Yefun Allah mo sukdu yo gato an krom, sare do, 'Ye gato Nan dakai bes wa ben Nan bi suk-i, bere Nan yo misyar An mukri mbras nde.'

36Mone Daud ki subot an dakai nde, wo Daud kibot Yefun Yesus. Daud dakai ben Yefun Allah bi suk-i ne, orge an kwop re. Ye bi an mo makwe tepsu ye bi an bi amui, orete an kaim mbras re.

37Sarewo Yefun Yesus kaim yo mbras nde. Yefun Allah sun Yefun Yesus kadit sukkwop o re.

38Saneyo, nin jammo suk gato ji ki ré et, Yefun Yesus anato kak os wa nin subere Yefun Allah yo maskwa nin mo sukibit gato nin ben ne o nde, An yo nutbot o nde. Ji anato ki subot os gato Yefun Yesus kak ne rer wa nin jam re.

39Men jammo Musa bi sukduno-i, bere yo tep nde, wo men onyar kem mo Yefun Yesus sa, bere Yefun Allah yo ben sukye nai men tepsu sukibit gato men ben ne o nde, wo An ki do, men sa, tep wa sok mo An bi rus-i it.

40Nin mewa nin dakai, sawe suk gato yenabi ki ne bor mo nin re. Yenabi ki Yefun Allah bi suktaru sare do,

41'Nin yé gato sa Ji mo suk gato Ji ben ne, nin mewa nin nggwa sisu ndo et! sawe nin gensu suk gato Ji ben, ete bere nin kwop, we, bere su kam gato nin kem mo bur, Ji ben suk yo gato ben nin yeket, wo bere nin misyar re. Yé da ki rer wa nin jam, sarewo nin misyar tó.' " Paulus ki sukdu ne, orge

42Paulus si Barnabas mu kadit ye Yahudi bi nu ari ne sa, yé mwa mone kiwa an we ma su kam Sabat, kam sye gato ne ma o, subere an we nukbot sukdu ne rer wai o.

43Yé mwa gato mo nu ari ne syesyar sa, ye Yahudi si yewis yi gato sok mo ye Yahudi bi agama ne mwa boribot Paulus si Barnabas. An we nuk sukdu su yé mwa ne, an we ki do, "Yefun Allah fro os ndo wa men, An ben sukndo su men yetu dakai yi, sane nin bi nin nggwa wa nin ben An bi suk-i petok sor."

44Kam Sabat, kam sye ne ma, or yé bok ne sino mo kota ne sum wa jam Paulus si Barnabas nuk sukdu subot men bi Yekwesu Yefun Yesus nai nje mone jam.

45Ye Yahudi me yé mwa mit iwa ma jam an we bi sukdu-i, sane ye Yahudi ne on sa mone, we yé mwa ne misyar suk gato ye Yahudi bi yesu ki ne, wo yé iwa jam sukdu gato an we ki ne sor. Sane ye Yahudi ne kabor an we. An ki Paulus ket kwayo-kwayo mo sukdu gato Paulus ki ne.

46Orge Paulus si Barnabas ki suk, an we yo nyu nde, an we ki pet mo nje mone do, "Men ka we ki Yefun Allah bi sukdu nai nin ye Yahudi nyim sor, wo nin bariwa sukdu ne. Nin nai sukjimnut do, nin bariwa nin kem ndo to kapyo mato kapyo, sane it yo, men ka we misyar nin it anare. Ré ne, men ka we mu ki sukdu ne nai yewis yi jam,

47we, Yefun Allah syaugat men, An ki nai men do, 'Ji ben nan tepsu sukru wa yewis yi, subere an jam Ji bi sukdu ne rer, tepsu sukru rer ku yetu. Sane bere nan gwat Ji bi sukdu gato ós yetu brek kadit os ibit subere án kem ndo to kapyo mato kapyo. Ji bes nan subere nan gwat sukdu ne mu mo pe mwa mo bur ré iwedewe sino.' "

48Yewis yi jam an we ki sane sa, án mit iwa, án un Yefun Allah mo sukdu subot men bi Yekwesu Yefun Yesus gato ye we ki ne. Ye gato Yefun Allah fro suga nyim wa sok mo An bi rus-i ne, wa kem ndo to kapyo mato kapyo, yé bok ne sino nai sukjimnut do, án brek kadit os nyim, ete án jammo Yesus Kristus tepsu án bi Yekwesu, án onyar kem mo Yefun Yesus it.

49Sukdu subot men bi Yekwesu Yefun Yesus ne, yé mu ki frek subot pe mwa mo bur ne sino.

50Sarewo ye Yahudi ge bok yo meret os subere nggon pasye gato sok mo ye Yahudi bi agama ge bok yo si yepasye mo kota ne sino maskwa ket an we. Sane yé bok ne meret os, án krokgat nje mone subere yé ben sukye nai Paulus si Barnabas, án syun ye we wé kadit án bi bur-i.

51Sane, an we tet an we gwes tak su bofuf ges wé kadit an we gwes subere nje mone jam do, ye we ne yo iwa sukibit gato yé mone ben nde. An we ben sane, orge an we mu kadit nat ne, mu mo kota Ikonium.

52Ye gato onyar kem mo Yefun Yesus mo kota Antiokhia mit iwa wai o re. Yefun Allah Gen bok nggwa mo án.



 <<  Kisah Para Rasul 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran