Alkitab Mobile SABDA
[VER] : [BERIK]     [PL]  [PB] 
 <<  Yohanes 15 >> 

1Yesus Jei ga gamjon ga gutena, "Aiba anggur timi galserem, nafsi afa fas Ai galserem. Aamei As ijeya tikwebaatinennerem, aamei tirni galserem. Uwa Amna Jeiba nems gerebaabisnenne.

2Tirni gemerserem Amnibe jam teyanaiserem, Jei ga gane targasini, ane tirni aa jewer gam tenaram, jem alna afwer gam fulsini, ane gam saaramulsini jega uskambar ga gam tena.

3Taterisi Ai is Ajes nasipminintim, jei ga maa ini imna is jei waakentabaipmini.

4Jeber-jeber Abar sa nwini, jepga Ai jeber-jeber ibara nwini. Afa tirni timip jam tensiyen, tirni jeiserem jam teyan. Aamei jegme gemer; afa jeber-jeber aamei Abar nejama tensiyen, afa ga enggam nei daamfennaber nejama nwinyen, gam jega aamei igi ijama domolyan, ga enggam aamei waakenfer ijama eyebiyen.

5Aiba anggur timi galserem, ane aamei tirni galserem. Afa angtane jeber-jeber Abara nwini, ane Ai jebar ge nwini, tirni jes galserem je timip gam tensini, jepga jei igi gase damtabili unggwanfer, ga enggam jei waakenfersus gam eyebili. Afa aamei Abar ijama nwinyen, aamei seyafter ijama eyebiyen.

6Afa angtane jei jeber-jeber Abar jei Ajam ge nwinyeneye, jei tirni gamserem timip jam tensiyen. Tirni jeiserem angtane gam fasawolwili, ane tirni jeiserem ga gam sasanswena. Jewer ga angtane ga gane kitulstena, tokwanap gane fasawolwili, jep gangge taabisini jamer fus.

7Afa aamei jeber-jeber Abar negama nwinirim, ane aamei taterisi Amna waakenfer isa sarbisini, apgal jigala ijesa domolfe, jam isa bala Uwa Amnaiserem Jemnibe. Jepga jigala jeiserem ip ga is golmini ibe.

8Afa aamei igiserem unggwanfer isa damtabili, ga enggam aamei waakenfer isa eyebili, jewer ga angtane ga sene damtana Uwa Amna Jeiba sanbagirem. Ane angtane ga sege towaswebili aamei Amsa tikwebaatini.

9Uwa Jei Ams nesiktene, jes gemerserem Aime isa gemer nesiktababili. Gasa eyebi Ai isa Ajes bilipminirim, ane Ai jeber-jeber isAs nesiktababili.

10Ai Ames eyebili Uwa Amna aa jes bilirim, ga jem temawer Jei jeber-jeber Ams nesiktene. Jes gemerserem, afa Ai Ajes bilipminirim aamei jeiserem ga isa eyebili, Ai jeber-jeber Aime isAs nesiktababili.

11Seyafter aaiserem Ai ims towas-towastababili, jega ini imna is saaserfer sege folbamini, ini Amna gamserem saaser-saasera. Ane ini imna ga uskambar saaser-saasersus sege folbamini.

12Aaiserem is Ajes balbabilirim ibe: Aamei in ina jam isa nesiksonanna, Ai gamserem Ai isa gam nesiktababilirim.

13Angtane bunarsusfer aa jei gam nesiktababilirim sarabosna jemna, angtane jes galserem saf gan tere, jega sarabosna jemna jewer ga gam naawena.

14Afa aamei isa eyebili is Ajes bilipminirim, aamei mese jemba Am sarabosna.

15Ai aamei is Ajam balbabiyen aas galserem, angtane awelna angtanefe aa jei ne gweyipminirim, aam temawer angtane awelna angtanefe aa jei gam gweyibenerem jei teisyena seyafter ini sanbaka jemnaiserem aa gam gam folbanaram. Ai ga ims balbabili aameime Am sarabosnam, aam temawer Ai is Ames towas-towastababili seyafter Ajes sarbilintim Am Uwaminiwer.

16Aamei As ijama balyan, 'Aamei Tuhan amna.' Jengga Ai ims balbabili Aamei Am tane. Ane Ai ga isAs baftabili, ga isa sofwa, ane igiserem unggwanfer ga isa damtabili, ga enggam isa eyebili waakenfer. Ane waakenfer aaiserem ijesa eyebilirim, jei jam tikweyan jamer abak-abaksus. Gam jega seyafter ijesa bilirim Am Uwaminiwer, afa aamei Ams isa tebana, Jei ga is golmini ibe.

17Aaiserem Ai isa Ajes bilipminirim ibe, aamei in ina ga jam isa nesiksonanna."

18Yesus Jei gamjon ga gutena, "Namwer aas jepserem angtane ogirmanaiserem jei Uwa Sanbagiri teisyena, ane jei im sene nasbabili. Gasa sarbistaabon, gwanan jeiba As gama ne nasbana.

19Angtane safna Ai As jei ne tebayanaiserem, jei jenjen sene nesiksonanna. Afa aamei safna jeiserem jebar daamfennaber isa nwinirim, jeime aamei isene nesiktababili. Jengga Ai isa mes balbabili, 'Au, safna angtane Ai As jam ne tebayanaiserem, angtane jeiserem sa mirtebitefal, Amnip ga isa jela, aamei gamjon jebar ijama nwinyen.' Jega jem temawer jei kakalmer ga im sene nasbabili.

20Gasa sarbistaabon taterisi gwanan is Ajes nasipminintim: 'Angtane awelna angtanefe aa jei gam gweyibenerem jei sanbakyan sanbaka jelemanaiserem jemniwer.' Aiba im Tuhansam. Angtane afweraiserem jei kapka Abe As mes ne eyeibene. Jes gemerserem angtane afweraiserem jegme kabwakfer isene eyeipmini imnibe. Angtane afweraiserem jei taterisi Amna waakenfer ne sarbili. Jes gemerserem angtane afweraiserem jegme taterisi imna waakenfer ga sene sarbili.

21Angtane jei kapka seyafter ip ga sene eyeipmini, aam temawer aamei As imesa tebana, ane jei jam ge towaswebiyen Uwa Sanbagiri Ai As Jei baftannunt.

22Ai Amesam fortya ogiribe. Ai angtane Amesam towas-towastababili, jengga jei jam ge tebayan. Jesam etam-etama kapka jemna. Afa Ai Ajam foroyana, ane angtane Ajam towas-towastababiyeneye, angtane enggam jam ge gubiyen, 'Ai etam-etamabara aam temawer ai Yesus ajama tebayan.'

23Angtane seyafter Ai As jei ne nasbanaram, jeme Uwa Amnaiserem gane nasbana.

24Angtane afa fas bwembwema jam eyebiliwer Ai gamserem, ane angtane mes ne domola seyafter Ai Ajes eyebilirim. Afa Ai Ajam eyebiyene bwembwema jem nenennabe, angtane enggam jam ge gubiyen, 'Ai etam-etamabara aam temawer ai Yesus ajama tebayan.' Jengga jes gamserem gamyan, jei mes ne domola Ai Ajes eyebilirim, ane jei kakalmer Ai As gemer sene nasmini, Ai Alem Uwafar.

25Jei kakalmer Am sene nasbana enggalfe Raja Daud aa jes tulistaabilim Taterisi Uwa Sanbagirminibe jeiserem gase etamwena. Ga enggam tulistaabil, 'Ai safe kapkaiserem jebe Ajam eyeipmiyen, jei kakalmer Am sene nasbana.'

26Angtane is Jeye batobaabiliserem gase forofya. Jeiba Mafnana Uwa Sanbagirmana, ane Jei is bunarsusferam nasipmini. Jeiserem Ai isAs baafulmisene, Ai jam Ajep fornaram Alem Uwaminibe. Jei Jam se jelaram Alem Uwaminiwer, Jei ga angtane gase towas-towastababifi Am temawer.

27Ane aamei jegme gemer, aamei angtane Am temawer isa towas-towastababifi aam temawer aamei Abar neya nwini Ai Agalap towaiwulu angtane Ai jam towas-towastababife.


  Share Facebook  |  Share Twitter

 <<  Yohanes 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran