1Ro Paulus, manwawan Yesus Kristus snar Allah marisen ḇyedi yaḇaryas asas ro kankenem kuker Yesus Kristus,
2faro Timotius, romawa karyer ayedi: saswar-fakamaman, ḇaḇye ma aski ro Allah Kmaya ma Yesus Kristus Manseren koḇedi, ryous aw kada.
3Yakofen kasumasa faro Allah, yuffarmyan kuker sneuser ḇesren imnis raris up ayesi sifrur kwar. Ma yaswarepen aw ḇesyakwar ro fararyor yena, ro roḇ ma meser.
4Ma rofyor yaswarepen mkaru ḇena, yamarisen fayasrow aw wer kuker marisen.
5Snar yaswarepen kakyar ḇesrendam bedi, isoine kakyar ḇekenem randak ro kpumi Lois ma ro snami Eunike ma yakyar naisya ro mankundaw kako.
6Eḇedari yaḇuk swarepen faro aw rofyor yasawardofen aw fabaryas fakamaman Allah ḇero awya.
7Snar Allah ḇyuk rur ḇemakakak maro koḇa, mboi rur ḇeḇawes samambraḇ, saswar ma ḇaḇeawnos.
8Inja wamsik ma besaksi Manseren koḇedi ma wamsik kako snar aya, snon ḇesmai ro bui snar Yesus Kristus, mboi wakḇe kandera faro Ankankinem Ḇeḇye ḇyedi kuker Allah samambraḇ ḇyedi.
9Allah iso ḇeḇuk koreri ḇeko ma ḇeyor ko kuker fararyor ḇesren, ḇeḇeknam ro fararur koḇena ḇa, mboi ḇyeknam ro kakara ma saswar-fakamaman mankundi ḇyena, ḇeḇuk ḇeko kwar ro Yesus Kristus ro awarmadero ḇaimya.
10Ma baboine ḇyeḇefasna snar rarama Yesus Kristus ro Ankankinem Ḇeḇye ḇeḇuk korerima ḇeko, ro papoik marmari kwar ma ḇeyun kankenem ḇekain fyoroya.
11Snar Ankankinem Ḇeḇye ine yaḇe ḇefasna imnis manbaryas, imnis manwawan ma imnis guru.
12Eḇedari yasma kandera kukerna kam, ḇape yamai ḇa; snar yafawi manseiso yakyarya ma yakyar nari ipok fyaduru rosai ikyar kwar maḇeaya isof ro Ras Ḇepupesya.
13Waserepen roi ḇeḇor wamnaf kwar ro aya imnis fasasna faro farkarkor ḇeḇye ma wafrurna kuker kakyar ma saswar snar Yesus Kristus.
14Faduru arasai ḇeḇye, sikyar kwarma ḇeko, ro Rur Ḇesren ḇekain ro kosnesna.
15Wafawi kwar mboi sikam ro supya mnuk Asia-Kasun si susubur aya; rarirya kako Figerus ma Hermogenes.
16Manseren ḇyuk ḇaḇye ḇyedi faro Onesiforus kina ḇyesi snar rarwan riḇeso kwar ifrur sneprei aya. Imai ḇa ryakaki aya ro bui.
17Fafisu aya isya ro Roma, syewar aya ma isrow aya kako kwar.
18Ma ro Efesus ifnoḇek aya nabor kwar. Roi ḇeradinena wafawi kwar. Manseren fyasna ḇaḇye ḇyedi faro i ro Ras Ḇepupesya kada.