Alkitab Mobile SABDA
[VER] : [BIAK]     [PL]  [PB] 
 <<  Ibrani 1 >> 

1Ro awar ḇeponiwara Allah dawawos ḇerarwan ono mufaḇe kpu koḇesi kuker nabi ḇyesya ro nyan nabor, ḇape ro awar ḇepupes ine Allah dawawos maḇeko kwar kuker Rumkun ḇyedi ḇeḇemanfanduya.

2Allah ḇyeasas kwar mboi Rumkun ḇyedi i ḇena roi ḇeḇor kam. Snar Yesus Allah ifrur kwar sansoren ḇoka.

3I ḇeḇeisnai ro Allah ḇaḇe baba ḇyedi; ma fanir ro Allah mankundi. Ikada fyaduru sansoren ḇoka ine kuker papoik ro wos ḇyedi. Ma fyasren snonkakusya ro sasar sena kwar, insape kyain ro karapesa sasoser fnoḇek Allah, ḇena papoik ḇekaki syadiya ro boiyaswa.

4I sma kankain ḇekaki syadi ro malaikatsya, imnis raris Allah snonsnon ḇyuk faroi kako ipyum syadi ro snonsnon malaikatsya.

5Snar Allah ikofen ḇaim radine faro malaikat oso: "Awkada Rumkun ayedi! ro ras ine yaḇe Kma faro aw?" ma Allah ikofen kako faro malaikat oso ḇaim, "Nari yaḇe Kma faroi, ma nari ḇyeromawaḇe aya?"

6Ma rofyor Allah iwan Rumkun rak ḇyedima ḇesupswan ine, ikofen radine: "Allah malaikat ḇyesi kam sḇansuba faro i."

7Faro malaikatsya, Allah ikofen radine: "Allah ifrur malaikat ḇyesi fasewamdoḇer, ma ḇeyuffarmyan besi fasimnis for ḇesber."

8Ḇape Allah ikofen faro Rumkun ḇyedi: "Karapesa nasan bedi, o Allah, nari kyain fyoro-fyoro, ma ḇaḇesasoser bedikada sasoser ḇaḇenapnapes."

9"Awkada wamarisen ḇaḇenapnapesya ma wayin ḇarḇorya, rarirya Allah, Allah bedi ryem aw kwar kuker mani imnis aḇyair marasrisen, isyadi ro min besi."

10Allah ikofen wer: "Ro awar ḇeponiwara, aw o Allah, wafrur kwar sup ine, ma kuker ḇramin beja wafrur nanki.

11Ma nari nakam napromes, ma nari nakwar imnis mar wai, ḇape awma nari farweḇa.

12Nari waper sansoren ḇoka ine imnis mar ma nari wasadwerna, ḇape auma nari fadwerḇa, ma kankenem bedi kyain fyoro-fyoro."

13Ma Allah ikofen ḇaim radine faro snon oso ro malaikat ḇyesi kako: "Kwain ro ḇar raku yedi, isof yafrur mbroḇ besi faskuk wepur ro ḇarpon bedi?"

14Malaikat ansi kam isoine rur ḇeyuffarmyan Allah sirya, ma iwan si fasifnoḇek snonkaku nari ḇesma koreri?



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel