Dual PanelSaul jumpa ras Samuel
1Lit sekalak bayak dingen erpengaruh, Kis gelarna. Ia i bas suku Benyamin nari. Ia anak Abiel, kempu Seror, i bas keluarga Bekorat, bagin i bas terpuk Apia nari.
2Lit sekalak anakna dilaki Saul gelarna, rupana mejile kal janah megegeh tuhu-tuhu. Saul gedangen sada takal asa kerina kalak si deban i Israel, ia ka pe si mejilena.
3Piga-piga kalde Kis nggo papak, emaka ikatakenna man Saul nina, "Buatlah sekalak suruh-suruhen ras kam jenari laweslah kam ndarami kalde e."
4Isiar-siarina taneh deleng-deleng Eperaim ras daerah Salisa, tapi la ia jumpa; emaka terus ka isiarina daerah Salim, tapi kalde e la lit i je. Kenca bage isiarina ka daerah Benyamin, tapi langa ka bo jumpa.
5Kenca ia seh i bas daerah Sup nina Saul man suruh-suruhenna, "Otalah mulih kita, sabap nggit me kari lanai inget bapa pe kalde e, janah aru atena kerna kita."
6Nina suruh-suruhen ndai ngaloi, "Timai lebe! I bas kuta enda lit sekalak si tutus ku Dibata si ihamati kalak tuhu-tuhu sabap kai si ikatakenna jadi kerina. Otalah sidahi ia, janah banci jadi ngasup ia nurikenca man banta i ja ingan kalde e."
7"Adi sidahi ia, kai si ibereken man bana?" nina Saul nungkun, "Pangan sitik pe lanai lit i bas tasta; ma lanai lit kai pe terbereken man bana?"
8Nina suruh-suruhen ndai, "I bas aku lit duit pirak si kitik. Banci kubereken e man bana, jenari kari tentu iturikenna man banta i ja ingan kalde e."
9Ngaloi Saul nina, "Mehuli katandu e! Ota dage." Emaka lawes ia duana ku kuta ingan kalak si tutus ku Dibata e. Asum ia nangkeng ku uruk-uruk kuta e, jumpa ia ras piga-piga kalak singuda-nguda si lawes muat lau. Isungkunina singuda-nguda ndai nina, "I jenda kang 'Kalak si lit pengenehenenna' e?" (Sanga si e sekalak nabi igelari "Kalak si lit pengenehenenna". Emaka adi isungkun kalak kenca atena Dibata nina, "Ota sidahi kalak si lit pengenehenenna e.")
10(1Sam 9:9)
11(1Sam 9:9)
12"I jenda," nina singuda-nguda ndai ngaloi. "Situhuna sitik kal ia leben asa kam. Adi pedas-pedas kam erdalan, tentu itundukndu ia. Kenca kam bengket ku bas kuta, tentu jumpa kam ras ia. Sendah denga nge ia seh i kuta, sabap anak kuta e erbahan persembahen i babo batar-batar si i das uruk ah. Kalak si iundang la banci ibenakenna man adi lenga ia seh i je, sabap la banci la ipasu-pasuna lebe persembahen e. Adi genduari kam lawes, jumpa denga kam ras ia ope denga ia lawes man ku das uruk e."
13(1Sam 9:12)
14Emaka Saul ras suruh-suruhenna minter lawes ku kuta e, janah asum ia bengket, idahna Samuel reh ndarat kempak ia muatna lawes ku ingan ersembah e.
15Sada wari ope denga si e nggo ikataken TUHAN man Samuel nina,
16"Pagi, kira-kira genduari ka, Kusuruh njumpai kam sekalak dilaki i bas suku Benyamin nari; tangkuhken ia jadi raja bangsangKu Israel alu namaken minak ku takalna, gelah ikelinina bangsangKu i bas bangsa Pilisti nari. Nggo Kuidah kiniseran bangsangKu janah nggo Kubegi sorana nderkuh mindo penampat."
17Asum Samuel ngidah Saul, ikataken TUHAN man bana nina, "Enda me kalakna si Kukataken man bandu e. Ia me pagi si merentah bangsangKu."
18Kenca bage lawes Saul njumpai Samuel, si sangana deherken gerbang, jenari isungkunina nina, "Banci nge ikatakenndu man bangku, i ja ingan kalak si lit pengenehenenna e?"
19Ngaloi Samuel nina, "Aku kap e. To leben kam ku ingan ersembah. Duana kam la banci la ras aku man sendah. Pagi erpagi-pagi kerina penungkunenndu banci kujabap jenari kusuruh kam mulih.
20Kerna kalde si bene telu wari si nggo lepas, ula atendu aru; nggo me idat kerina. Tapi ise kin si ngenana kal ate bangsa Israel? Kam kap e, kam ras isi jabu bapandu."
21Erjabap Saul nina, "Aku i bas suku Benyamin nari, suku si kitikna i Israel, janah keluargangku kap si medunguna i bas suku e. Ngkai maka bage nindu ngerana man bangku?"
22Kenca bage ibabai Samuel me Saul ras suruh-suruhenna ku bas kamar si galang jenari iberekenna man bana sada ingan i bas takal meja ingan temue-temue kundul, si teremna lit kira-kira telu puluh kalak.
23Ikataken Samuel man si erdakan nina, "Baba ku jenda daging si kubereken man bandu, si kusuruh gelah iserapkenndu."
24Emaka ibaba si erdakan ndai daging paha pilihen jenari itamakenna i lebe-lebe Saul. Nina Samuel, "Daging enda nggo iserapken man bandu. Panlah. Kuserapken e gelah ipanndu genduari ras kalak si kuundang." Emaka man me Saul ras Samuel i bas wari e.
25Asum ia ngincuah i bas ingan ersembah e nari ku bas kuta, ibahan kalak ndai ingan medem man Saul i das tarum,
26emaka medem ia i je.
Saul iminaki Samuel jadi raja
Kenca nggo siang erpagi-pagi, idilo Samuel me Saul ku das tarum nina, "Kekeken, gelah kupeberkat kam mulih." Keke Saul, jenari ndarat ia ku pasar ras Samuel.
27Kenca ia nggo seh i tepi-tepi kuta e nina Samuel kempak Saul, "Katakenlah man suruh-suruhen e gelah leben ia lawes asa kita." Lawes suruh-suruhen ndai, jenari iterusken Samuel ngerana nina, "I jenda kam kentisik, maka kuturiken man bandu kai si nggo ikataken Dibata."