Dual Panel1Ammukona, ambangung bari’basa’ dudumi Yosua siagang sikontu umma’ Israel, nampa nabokoi tampa’ pakkemaanna ke’nanga ri Sitim, siagang a’lampa mange ri Binanga Yordan. Anjoreng akkemami ke’nanga siagang attayammi wattu untu’ a’limbang.
2Allalonamo tallungallo, akkulilimmi a’jappa sikamma pamimpinga ri sikontu pakkemaanga,
3nampa napabattu mae ri umma’ Israel parenta kammaya anne, "Punna nucini’ sikamma imanga ambuleki Patti ParjanjianNa Karaeng Allata’alanu, paralluko a’lampa todong ambokoi anne tampa’ pakkemaanga. Pinawangi anjo Pattia,
4mingka teako ambani dudui ri anjo Pattia a’jappa; pinawangi battu ri boko kira-kira se’re kilometere’ bellana. Jari kammaminjo nalanuasseng agang kereanga musti nuolo, nasaba’ tena le’bakapi nuolo anne daeraya."
5Nakana Yosua mae ri umma’ Israel, "Parallui nupakatangkasa’ kalennu, nasaba’ ammuko nia’ gau’ appakalannasa’ laNagaukang Batara ri tangnga-tangnganu."
6Nampa naparentakang Yosua sikamma imanga sollanna naangka’ anjo Patti Parjanjianga nampa a’lampa riolo ri dallekanna umma’ Israel. Nagaukammi ke’nanga anjo apa naparentakanga Yosua mae ri ke’nanga.
7Nakana Batara mae ri Yosua, "Appakkaramula anne alloa laKupa’jariko tau malompo sa’genna sikontu umma’ Israel lanapakalompoko siagang nasadari angkanaya iNakke anrurungangko sangkamma Kururunganna Musa.
8Kamma-kamma anne parentakangi mae ri sikamma imang ambulekai anjo Patti Parjanjianga sollanna punna battu ke’nanga mange ri binangaya, musti antamaki ke’nanga ri je’ne’ binangaya siagang ammenteng ri ampi’ biring binangaya."
9Nampa nakio’ Yosua tu Israel, na nakana ri ke’nanga, "Maeko, pilangngeri ngasengi apa Naparentakanga Karaeng Allata’alanu mae ri kau.
10Punna majuko sinampe’, mattantu laNabongkai Batara anjo tu Kanaan, tu Het, tu Hewi, tu Feris, tu Girgasi, tu Amori siagang tu Yebus. Siagang punna a’limbammo Patti ParjanjianNa Batarana sikontu linoa ri Binanga Yordan a’jappa ri dallekannu, lanuciniki angkanaya niaki Allata’ala mattallasaka ri tangnga-tangnganu.
11(3:10)
12Kamma-kamma anne paralluko ammile sampulo anrua tau, iamintu tasse’rei battu ri massing suku bansa Israel.
13Sinampe’ punna anjo imang-imang ambulekai Patti ParjanjianNa Batara napaonjo’mi bangkenna antama’ ri je’neka ri Binanga Yordan, ammantammi a’lo’loro’ je’ne’na; anjo je’ne’ a’lo’loroka ri ulunna anjo binangaya lammantangi ri se’re tampa’."
14Anjo wattua sitabangi wattu pakkattoang; na kamma biasa anjo wattua allumpai je’ne’na Binanga Yordan. Ri wattunna nabokoi tu Israel pakkemaanna ke’nanga untu’ a’limbang ri Binanga Yordan, a’jappa riolomi sikamma imanga na naerang Patti Parjanjianga. Na ri wattunna napaonjo’ bangkenna anjo imang-imanga antama’ ri je’ne’ binangaya,
15(3:14)
16ammantang memammi silalonna a’lo’loro’ je’ne’na anjo binangaya. Bellai, irate ri bageang ulunna anjo binangaya, asse’remi je’ne’na ri Adam, iamintu se’reang kota niaka ammantang ri ba’leanna kota Sartan. Anjo je’ne’ a’lo’loroka mange ri Tamparang Matea ammantang taba sikali, sa’genna akkullemo bansa Israel a’limbang irate ri butta kalotoroka assidallekanga siagang kota Yerikho. Anjo sikamma imang-imang ambulekai anjo Patti Parjanjianga tuli ammentenna ri tangnga-tangngana binangaya sa’genna battu ngaseng anta’le sikontu umma’ Israel.
17(3:16)