Alkitab Mobile SABDA
[VER] : [SIMALUNGUN]     [PL]  [PB] 
 <<  Kejadian 41 >> 

Nipi ni Parao

1Jadi dob salpu girtip dua tahun, marnipi ma Parao, jongjong ma ia i topi ni Bah Nil.

2Taridah ma tangkog hun Bah Nil ai pitu lombu na jenges-jenges janah na mombur-mombur, jadi manggagati ma sidea bani arung-arung ai.

3Dob ai soluk, tangkog ma pitu lombu na legan hun Bah Nil ai, na bajan-bajan anjaha na merung-merung, jongjong i lambung ni lombu na i topi ni bah ai.

4Jadi ipampangani lombu na bajan-bajan ampa na merung-merung ai ma lombu na jenges-jenges ampa na mombur-mombur ai. Dob ai tarpuho ma Parao.

5Tarpodom ma ia use, anjaha marnipi ma paduahalihon; taridah ma kaluar humbani sangkambona pitu kambuyur gandum na porngis anjaha na jenges.

6Dob ai taridah homa ma tubuh pitu kambuyur gandum na merung anjaha na melus ibahen logou na hun hapoltakan.

7Jadi ibonduti buyur na merung ai ma na pitu kambuyur na porngis anjaha na jenges ai. Jadi tarpuho ma Parao, tonggor ma, nipi do hape.

8Patar ni ai susah tumang ma uhurni. Isuruh ma na mangalopi haganup partondung pakon na pentar na i tanoh Masir. Ipajojor Parao ma nipini ai hubani sidea, tapi sahalak pe lang na boi patorangkon ai hubani Parao.

9Jadi ihatahon kopala ni sitahu anggur ai ma hubani Parao: Huingat do salahku sadari on.

10Sanggah na manringis Parao hubani jabolonta, gabe iondoskon ahu pakon kopala ni simasak ruti ondi hu tutupan, na i rumah ni kopala pangawal,

11jadi marnipi ma hanami bani na saborngin, ahu pakon ia, legan bei do arti ni nipinami ai.

12Adong do ijai sada garama, halak Heber hasomannami, jabolon ni kopala pangawal ai, ipatugah hanami ma nipinami ai hu bani, gabe itorhai ma ai bennami, marguru hubani nipinami do itorhai.

13Anjaha songon tinorhaanni ai bennami, sonai do homa tarjadi; mulak do ahu hu jabatanku, targantung do anggo ia.

Itorhai si Josep Nipi ni Parao

14Isuruh Parao ma na mangalopi si Josep; jadi podas ma ipaluah sidea ia hun tutupan ai, isuhur ma gumisni anjaha igantihi ma hiouni, dob ai laho ma ia mangadap Parao.

15Nini Parao ma dompak si Josep, “Na marnipi do ahu, hape sahalak pe lang na boi manorhaisi. Tapi hubogei do baritamu, nini halak: anggo adong ibogei ho nipi, mintor ibotoh ho do manorhaisi.”

16Nini si Josep ma mambalosi Parao, “Sedo ahu, Naibata do na patugahkon hasonangan hubani Parao.”

17Dob ai nini Parao ma dompak si Josep, “Marnipi do ahu, jongjong do ahu i pasir ni Bah Nil;

18dob ai kaluar ma pitu lombu na mombur anjaha na jenges rupani humbani Bah Nil ai, anjaha laho manggagati arung-arung ai.

19Dob ai siluk ma kaluar pitu lombu na legan, merung anjaha bajan tumang rupani, seng ongga ope huidah na sonai bajanni i sab tanoh Masir.

20Ipampangani lombu na merung ampa na bajan ai ma hapitusi lombu na mombur na parlobei ai.

21Das ma ganupan ai hu boltokni ibonduti, tapi lanjar do lang adong tanda, na dob i boltokni ai, ai lanjar bajan do rupa ni sidea, songon na bani mulani ai. Jadi tarpuho ma ahu.

22Huidah ma use ibagas nipingku kaluar hun sangkambona pitu kambuyur gandum na porngis anjaha na dear.

23Dob ai tubuh ma use pitu kambuyur na legan, horah, merung anjaha melus ibahen logou na hun hapoltakan.

24Jadi ibonduti buyur na merung ai ma hapitusi buyur na jenges ai. Domma namin hupatugah ganupan ai hubani partondung, tapi sahalak pe lang na boi patorangkonsi hu bangku.”

25Dob ai nini si Josep ma dompak Parao, “Sada do arti ni nipi ni Parao ai. Ipatugah Naibata do hubani Parao, na sihol pamasaon-Ni.

26Na pitu lombu na dear ai, pitu tahun do ai, anjaha na pitu kambuyur na dear ai, pitu tahun do homa ai; sada do arti ni nipi ai.

27Na pitu lombu na merung anjaha na bajan ai, na soluk kaluar use, pitu tahun do ai; na pitu kambuyur na lapungon anjaha na melus ai ibahen logou na hun hapoltakan, lohei sipitu tahun do ai.

28Ai ma na dob huhatahon hubani Parao; ipataridahkon Naibata do hubani Parao na sihol pamasaon-Ni.

29Tonggor ma masa ma pitu tahun pariama bolon i sab tanoh Masir.

30Irik hujai masa ma use pitu tahun lohei; gabe halupahonon ni halak ma ganup pariama bolon ai i tanoh Masir, halani bois ma tanoh in bahenon ni lohei ai.

31Lang be botohon ni halak pariama bolon na i tanoh in bahenon ni lohei na soluk ai, ai sabonar bajan tumang do ai.

32Anjaha mambahen na pala dua hali marnipi Parao, artini ai: domma itotapkon Naibata na masa ai, anjaha podas ma pamasaon-Ni.

33On pe, ipindahi Parao ma sada halak na pantas anjaha na pentar maruhur sipabangkitonni patorsahon tanoh Masir.

34Ihatahon Parao ma pabangkitkon kopala-kopala i nagori on, laho patumpuhon saparlima ni gogoh ni tanoh Masir ibagas na pitu tahun pariama bolon ai.

35Ipatumpu sidea ma sagala sipanganon ibagas tahun pariama bolon na roh on, anjaha ipagugun hinan ma gandum sikuasaan ni Parao bahen sipanganon i kota-kota, anjaha isimpan ma ai.

36Jadi bohal ma ai i tanoh on bani lohei sipitu tahun na sihol masa ai i tanoh Masir, ase ulang maseda tanoh on halani lohei ai.”

Parbangkit ni si Josep

37Dear tumang do ojur ai bani uhur ni Parao pakon juakjuakni ganupan.

38Jadi nini Parao ma hubani juakjuakni ai, “Boi ma jumpah hita sada halak na songonsi, na niiankon ni Tonduy ni Naibata?”

39Nini Parao ma dompak si Josep, “Halani domma ipabotohkon Naibata haganupan on bam, seng dong be halak na pantas anjaha na pentar maruhur na songon ho.

40Ondos hubam ma rumahku, anjaha balosan ni bangsangku ma parentahmu; pitah paratas on ma hasurunganku humbam.”

41Ambah ni ai nini Parao ma dompak si Josep, “Tonggor ma, domma hupabangkit ho manguasai ganup tanoh Masir.”

42Dob ai itanggali Parao ma tintinni humbani tanganni, inahkon ma ai hubani tangan ni si Josep; isorungkon ma hubani pakean humbani kaen na alus, anjaha ibahen ma horung-korung omas hu borgokni.

43Ipanaik ma ia hu garetani paidua, anjaha martingting ma sidea i lobeini, “Manrogop ma nasiam! Ase sonai ma ia ipabangkit Parao, markuasa i sab tanoh Masir.”

44Ambah ni ai nini Parao ma hubani si Josep, “Ahu do Parao, tapi anggo lang ibagas botohmu, sahalak pe lang na boi mangangkat tangan atap naheini i sab tanoh Masir.”

45Ibahen Parao ma goran ni si Josep: Zafenat Paneah, anjaha ibere ma hubani si Asnat, boru ni si Potifera, malim i huta On, bahen parinangonni. Dob ai misir ma si Josep manginggoti tanoh Masir.

Si Josep Raja Paidua i Tanoh Masir

46Tolu puluh tahun ma umur ni si Josep sanggah na jongjong ai ia ilobei ni Parao, raja ni Masir. Misir hun lobei ni Parao ma si Josep, laho manginggoti ganup tanoh Masir.

47Ibere tanoh ai ma gogohni marjunjun ibagas na pitu tahun pariama bolon ai.

48Dob ai ipatumpu si Josep ma haganup sipanganon ibagas sipitu tahun ai, na adong i tanoh Masir, isimpan ma ai i kota-kota; gogoh ni juma inggot ni ganup kota, inahkon ma ai hubagas kota ai.

49Jadi songon horsik na i topi ni laut ma hinabuei ni omei na pinajunjun ni si Josep ai, pala iparontihon use manuhati, halani lang be tarsuhati.

50Dob ai tubuh ma dua anak bani si Josep, sanggah lang roh ope tahun lohei ai, ai ma na tinubuhkon ni si Asnat, boru ni si Potifera, malim i huta On.

51Ibahen si Josep ma goran ni bunga-tubuhni ai si Manase, halani nini, “Lupa do ahu ibahen Naibata bani haganup hasombuhonkin ronsi rumah ni bapa.”

52Goran ni na paduahon ai ibahen si Efraim, halani nini, “Ai gabe do ahu itumpak Naibata i tanoh hadoyukonkin.”

53Dob salpu na pitu tahun pariama bolon ai i tanoh Masir,

54mulai ma roh lohei sipitu tahun na ipatugah si Josep hinan. Masa ma lohei bani haganup nagori, tapi i sab tanoh Masir adong do sipanganon.

55Dob loheian haganup tanoh Masir, anjaha mandoraki rayat haganupan mangindo sipanganon hubani Parao, nini Parao ma hubani haganup halak Masir ai, “Laho ma hanima hubani si Josep, bahen ma aha na hinatahonni bennima!”

56Ase dob masa lohei bani sab dunia on, iungkab si Josep ma sagala tuangan anjaha ijual ma gandum hubani halak Masir, halani parah tumang do lohei ai i tanoh Masir.

57Roh ma homa hun sab dunia on halak hu tanoh Masir laho mamboli gandum humbani si Josep, halani parah tumang do lohei ai i sab dunia on.


  Share Facebook  |  Share Twitter

 <<  Kejadian 41 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran