Alkitab Mobile SABDA
[VER] : [SIMALUNGUN]     [PL]  [PB] 
 <<  Yeremia 13 >> 

Pasal Gondit na Pinonopkon, na Gabe Madotei ai

1Sonon do hata ni Jahowa hu bangku, “Laho ma ho, boli ma sada gondit linnen, anjaha gonditkon ma ai bani binongeimu, tapi ulang hona bah bahen ai.”

2Jadi huboli ma sada gondit domu hubani parentah ni Jahowa, anjaha hunahkon ma ai bani binongeihu.

3Dob ai roh ma hata ni Jahowa hu bangku paduahalihon, nini,

4“Buat ma gondit na binolimai, na bani binongeimai, anjaha misir ma ho laho hu Bah Eprat, ponopkon ma ai bani rigat ni dolog batu.”

5Jadi laho ma ahu, huponopkon ma ai i topi ni Bah Eprat, songon na hinatahon ni Jahowa bangku.

6Dob ai bani dokah-dokah ni ari, nini Jahowa ma hu bangku, “Misir ma ho hu Bah Eprat, alop ma hunjai gondit ondi, na Huhatahon ponopkononmu ijai.”

7Dob ai laho ma ahu hu Eprat, jadi huhurak anjaha hubuat ma gondit ai humbani pamonopanni hinan. Tonggor ma, domma madotei gondit ai, seng marguna be atap bahen aha pe.

8Dob ai roh ma use hata ni Jahowa hu bangku,

9“Sonon do hata ni Jahowa, Sonai do usih parsedaon-Ku gijang ni uhur ni Juda ampa pangenjengon ni Jerusalem na banggal ai.

10Bangsa na jahat on, na mangengkar manangihon hatang-Ku, na marparlahou mangihutkon uhurni na hengkeng in, anjaha na mangirikkon naibata na legan, laho mambalosi anjaha marsombah hujai, maningon dos do sidea bani gondit on, na so marguna atap bahen aha pe.

11Songon gondit na longkot bani binongei ni dalahi, sonai do Hulongkotkon Bangku ganup ginompar ni Israel ampa haganup ginompar ni Juda,” nini Jahowa, “Ase gabe bangsang-Ku sidea. Gabe barita, puji-pujian ampa hamuliaon Bangku, hape seng ra sidea manangihon.”

Pasal Gusi na Ginokan bani Anggur ampa na Niropukan ai

12Hatahon ma bani sidea hata on, “Sonon do hata ni Jahowa Naibata ni Israel, ʻSagala gusi maningon gokan do bani anggur.ʼ Jadi anggo ihatahon sidea bam, ʻAi lang ibotoh hanami do maningon gokan sagala gusi bani anggur?ʼ”

13Jadi hatahon ma bani sidea, “Sonon do hata ni Jahowa, ʻTonggor ma, gok hamabukon do bahenon-Ku haganup pangisi ni nagori on: Raja-raja na hundul bani paratas ni si Daud, malim-malim, nabi-nabi ampa haganup pangisi ni Jerusalem.

14Anjaha marsiropukan do sidea bahenon-Ku, ronsi bapa hu bani anakni,ʼ” nini Jahowa, “Seng holong atei-Hu, seng manosal Ahu anjaha seng marpangulaki uhur-Hu, maningon bois do sidea bahenon-Ku.”

Ojur-ojur Martoruh ni Uhur i Lobei ni Jahowa

15Tangar anjaha tangihon hanima ma, ulang ma mangenjeng, ai Jahowa do na marsahap.

16Bere hanima ma hasangapon bani Jahowa Naibatanima, sanggah lape iparoh hagolapan, sanggah lape tartuktuk naheinima bani dolog na golap, anjaha sanggah paima-imahon haliharon hanima, gabe ipaubah ai jadi hagolapan anjaha ibahen ai gabe na lotir.

17Tapi, anggo seng ra hanima, maningon tangis ma tonduyhu bani na lungun halani gijang ni uhurnima ai; marbaoran ma iluh humbani matangku, halani hona buang hulanan ni Jahowa.

18Hatahon ma bani raja in ampa bani inang ni raja in, ʻPatoruh hanima ma parhundulnima, ai domma matektek sortali hamuliaon humbani ulunima.ʼ

19Huta na i tanoh Dangsina domma tartutup, sahalak pe seng dong na mangungkab. Haganup do Juda maningon tarbuang, tarbuang do sidea haganup.

Hona Butakan do Jerusalem halani Buei ni Hajahatonni

20Mangkawah ma hanima anjaha idah ma sidea ai na roh hun utara. Ija do hulanan ni biribiri na dob niondoskon bam, biribirimu na jenges-jenges ai?

21Aha ma hatahononku, anggo ipabangkit panggomgom bam, ai ma sidea, na dob niajar-ajaranmu gabe hasoman bam? Ai lang mangonai ma bam na maborit, songon bani sada naboru na sihol tubuhan anak?

22Anjaha anggo ihatahon ho ibagas uhurmu, ʻMase ma mangonai na sonon bangku?ʼ Halani buei ni salahmu do, ase isintak hioumu hu atas anjaha hona butakan ho.

23Ai boi do ipaubah halak Etiopia hulingkulingni atap begu jolangjolangni? Sonai ma sabonar seng tarbahen hanima mambahen na madear, hanima na dob somal mangkorjahon na jahat.

24Halani ai erapon-Ku ma hanima songon lamlam na niombuskon ni logou, na roh hun halimisan.

25Ai ma rupeimu, parbagiananmu na dob Husuhat bam,” nini Jahowa, “Halani ihalupahon ho Ahu, anjaha martenger ni uhur ho bani ladung.

26Sintakon-Ku do hioumu das hu atas ni bohimu, ase taridah hailaonmu.

27Ai ma parbangkisonmu, hagarangonmai ampa parriah-riahonmu. Huidah do horjamu sihagigihononkon i atas buntu-buntu ampa i tongah ladang. Bursik ma ho, ale Jerusalem! Sadia dokah nari ase pansing ho?”


  Share Facebook  |  Share Twitter

 <<  Yeremia 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel