Alkitab Mobile SABDA
[VER] : [TORAJA]     [PL]  [PB] 
 <<  1 Raja-raja 3 >> 

Passambayangna Salomo umpalaku kakinaan

1Pakalan napomatusami Salomo tu Firaun datu Mesir, belanna napobaine tu lai’na Firaun sia nabaamo tama kotana Daud sae lako mangkanna tu datu umbangun tongkonan layukna sia banuanNa PUANG sia rinding tembo’ tu untikui Yerusalem.

2Attu iato iatu mintu’ to buda dao bangpa mintu’ inan madao nanii memala’, belanna sae lako allo iato tae’pa banua dipabendanan sanganNa PUANG.

3Sia napapayan Salomo tu kamamaliranna lako PUANG diona unturu’ apa napondok Daud ambe’na; apa dao bangpa inan madao nanii memala’ sia untunu pemala’ ditunu pu’pu’.

4Malemi tu datu lako Gibeon la memala’ dio, belanna iamote tu inan madao mala’bi’na tongan; napemalarammi Salomo tu pemala’ ditunu pu’pu’ sangsa’bu dao inan pemalaran iato.

5Dio Gibeon ombo’mo tu PUANG lako Salomo lan tindona tonna ibongi, sia ma’kada tu Puang Matua Nakua: Palakui apara tu la Kubenko?

6Mebalimi tu Salomo nakua: Mipakitanmo taumMi Daud, ambe’ku, tu kamasokanan kapua, susitu kalolanganna dio oloMi situang kamarurusan sia kamalamburan sia lantuk penaa lako KaleMi; na iatu kamasokanan kapuaMi Mipatontong dio kalena, Miurunganni ungkamaseanni misa’ anak, tu unnisung dao kapayunganna susite allo iate.

7Na totemo, o PUANG, Kapenombangku, Kamu Kalenamo unnangka’i datu te taumMi ussonda ambe’ku Daud, moi angku misa’ to mangura; tang kuissanpa tu torro ke’de’ku.

8Iate taumMi bendan lan tangnga bangsaMi, tu mangka Mipilei langsa’, misa’ bangsa kapua tu tang dikemba’ diia’ ba’tu tang dipura dibilang diona kabudanna.

9Iamoto, benni te taumMi tu kamatarrusan la umpaolai salu te bangsaMi, anna ma’din umpasisengaranni tu melo anna kadake, belanna mindara la umbelai umpaolai salu te bangsa budamMi?

10Naalami penaanNa Puang tu palaku susinna Salomo to.

11Sia Nakua Puang Matua lako kalena: belanna ia mupalakuiNa’ te ianna te, sia tae’ mupalakuan kalemu kamalamberan sunga’ sia kasugiran, sia tae’ mupalakui, anna mate tu mai ualimmu, apa ia manna mupalakuan kalemu tu kamatarrusan la untimbang melo kara-kara;

12manassa la Kupogau’ susitu kadammu; tonganna la Kukamaseangko penaa kinaa sia kamatarrusan, naurunganni tae’ padammu te attu lendu’ sia iate attu mutingayo lako tae’ la bendan tu padammu.

13Sia ia duka tu apa tae’ mupalakui, la Kukamaseangko, la kasugiran la kamala’biran, naurunganni dio lu mintu’ datu lan mintu’ allo katuoammu tae’ tu padammu.

14Sia iake lolangko unnola lalanKu sia mukaritutui tu mintu’ apa Kupondok sia mintu’ pepasanKu susi kalolanganna Daud, ambe’mu, manassa la Kupamalambe’ tu sunga’mu.

15Mangkato pana’dingmi tu Salomo, a’a, tindo ia pale’. Malemi tama Yerusalem anna bendan dio tingayo patti basseNa Puang sia umpemalaran pemala’ ditunu pu’pu’ sia umpennoloan pemala’ kasalamaran, anna padenanni pa’maruasan kurre sumanga’ tu mintu’ taunna.

Kamatarrusanna Salomo urra’ta’ misa’ kara-kara

16Attu iato saemi da’dua baine bualang mennolo lako datu anna bendan dio olona.

17Ma’kadami tu misa’ nakua: Tabe’ puang, iatu aku na iate baine iate sirurankan, sia kianakna’ lan banua iato, tu nanii torro.

18Tallung allo mangkangku kianak, anna kianak duka tinde sia kami manna sola dua, tae’ to senga’ kisolan lan banua iato.

19Matemi tu anakna muane te baine iatinde tonna bongi, belanna nai’pinni.

20Millikmi tinde baine tonna ma’tangnga bongi, naalai tu anakku dio mai sa’deku tongku leppeng, napamamma’i lan rianna na iatu anak matena napamamma’ lan riangku.

21Iatongku millik tonna tibangka’ masiang la umpasusu anakku, a’a matemo ia, apa iatonna masiangmo kutiro meloi, a’a natangia anakku te tu kudadian.

22Apa ma’kadami tu baine senga’ nakua: Tae’ natongan! iatu tuona anakku, na iatu matena anakmu. Nakuaomi tu misa’na: Tae’ natongan, iatu matena anakmu, na iatu tuona anakku. Susito site’ge’mi dio tingayona datu.

23Ma’kadami tu datu nakua: Nakua tu misa’: iate tuona anakku na iatu matena anakmu; nakuami tu senga’na: tae’ natongan, iatu matena anakmu na iatu tuona anakku.

24Nakuami datu: Alanna’ pa’dang misa’. Nabaammi pa’dang tau tu datu.

25Ma’kadami tu datu nakua: Sese duai tu pia tuo, mibenni tu sangsese lako te misa’na na iatu sangsesena lako to senga’na.

26Ma’kadami tu baine tuo anakna lako datu, belanna mamasseng lako anakna, nakua: Tabe’ puangku, ben bangmi lako te pia tuo, apa da maro mipatei. Apa nakua tu senga’na: Nakeori, tang lu lako kaleku, tang lu lako kalemu, sese bangmi.

27Mebalimi tu datu sia ma’kada nakua: Ia miben tu pia tuo, sia inang tae’mi la umpatei, belanna iamoto tu indo’na.

28Iate pangra’ta’na datu narangi mintu’ to Israel, nakabangnga’mi tu datu, belanna natiro kumua den kamatarrusanNa Puang Matua lan ba’tengna, la ma’paolai salu.


  Share Facebook  |  Share Twitter

 <<  1 Raja-raja 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran