Dual PanelPa’pangada’na Yeremia lan to’ Banua Kabusungan sia kaditumpuanna pa’pangada’na
1Iatonna pamulanna kadatuanna Yoyakim, anakna Yosia, datu Yehuda, rampomi te kadanNa PUANG, Nakua:
2Inde sia tu kadanNa PUANG: Malemoko lako ammu ke’de’ dio to’ tarampak banuanNa PUANG, sia pokadai lako mintu’ pa’tondokan Yehuda, tu sae menomba lan banuanNa PUANG, tu mintu’ kada Kusuangko umparampoi; moi sangbuku kada da mukurangi.
3Den sia manii upa’ nama’perangi tu tau iato mai anna pantan mengkatoba’ dio mai kakadakeanna, angKu urunganni menassan la umparampoi kamandasan tu Kutangnga’, belanna kakadakeanna gau’na.
4Iamoto pokadanni tau iato mai kumua: Inde sia tu kadanNa PUANG: Iake tae’i miperangiiNa’ sia tae’ mituru’i tu Sukaran alukKu, tu mangka Kuadarangkomi,
5sia tae’ miperangii kadanNa taungKu iamotu mai nabi tu Kusua lako kalemi, ke makale’ sia ke karoen, natae’ miperangii,
6manassa iate banua la Kupasusi Silo, sia kota iate la Kusanggang anna sa’bu’i mintu’ bangsa dao kuli’na padang ke ma’tampak ropui.
7Mintu’ to minaa sia nabi sia to buda umperangii Yeremia umpokadai te mintu’ kada iate lan banuanNa PUANG.
8Iatonna mangkamo tu Yeremia umpokadai tu mintu’ apa Napasan PUANG la diparampoan to buda, natingkanmi mintu’ to minaa, nabi sia mintu’ to buda sia nakua ungkuanni: Manassa la dipateiko.
9Ma’apai ammu ma’nubua’ tete dio sanganNa PUANG, kumua: La susi Silo te banua iate, sia la sanggang te kota iate, naurunganni moi misa’ tau tae’mo untorroi! Nasikarupuimi to buda la ullaoi tu Yeremia lan banuanNa PUANG.
10Iatonna rangimi arungna to Yehuda tu apa iate, ke’de’mi dio mai tongkonan layukna datu lako to’ banuanNa PUANG, anna unno’ko’ dio to’ babangan ba’ru lan banuanNa PUANG.
11Ma’kadami tu mintu’ to minaa sia nabi lako mintu’ arung sia to buda nakua: Sipatu tau iate la mate, belanna ma’nubua’ tu diona kakadakeanna kota iate, susitu kamu kalenamo urrangii.
12Apa nakua Yeremia lako tu mintu’ arung sia lako tu mintu’ to buda, kumua: Nasuana’ PUANG ma’nubua’ tu diona banua iate sia kota iate, iamotu mintu’ kada mangkamo mirangi.
13Iamoto pemeloimi tu kedomi sia mintu’ penggaurammi, sia perangiimi tu kadanNa PUANG, Kapenombammi, anNa penassanni PUANG tu mintu’ kamandasan Napokada diona kamu.
14Iatu aku lanna’ kuasammi, pogau’mi lako kaleku tu misanganna melo sia malolo dio pentiromi.
15Apa la miissan melo kumua, iake mipateina’, manassa umpapassannikomi kalemi rara to tang kasalan sia kota iate sia mintu’ to untorroi; belanna tonganna Nasuana’ PUANG la umpalanda’i tama pa’perangimmi te mintu’ kada iate.
16Nakuami tu mai arung sia to buda lako mintu’ to minaa sia mintu’ nabi kumua tang sipatu tau iate, ke la dipakannai ukungan dipatei, belanna ma’kada lako kaleta tete dio sanganNa PUANG, Kapenombanta.
17Sia bendan duka tu ba’tu pira-pira pekaamberan lan tondok, anna ma’kada lako kasirampunanna to buda nakua:
18Iatonna linona Hizkia, datu Yehuda, ma’nubua’mi Mikha, to Moresyet sia ma’kada lako mintu’ bangsa Yehuda, nakua: Inde sia tu kadanNa PUANGna mintu’ ma’dandan maritik, kumua: Iatu Sion la ditengko susi pa’lak sia Yerusalem la daun lauan, sia iatu buntu nanii Banua Kabusungan la membuntu pangala’ kamban.
19Napateiraka Hizkia, datu Yehuda sia mintu’ to Yehuda? Tang mataku’raka tu datu lako PUANG, anna mengkamoya dio oloNa PUANG? Iamoto Namenassan tu PUANG diona tu kamandasan, tu mangka Napokada la Naparampoan tu tau iato mai. Ma’apai anta la umpogau’ kakadakean kapua tu la untumang kaleta?
20Sia den duka misa’ tau bendan ma’nubua’ tete dio sanganNa PUANG, iamotu Uria, anakna Semaya, dio mai Kiryat-Yearim: ma’nubua’ anna rampoi kamandasan te kota sia padang iate, susitu mintu’ kada napokada Yeremia.
21Apa iatonna rangimi Yoyakim sia mintu’ pangulunna sia arungna tu kadanna, nadakarammi datu lalan la napatei. Iatonna rangimi Uria tu diona to, mataku’mi anna mallai rampo lako Mesir.
22Apa nasua datu Yoyakim tu ba’tu pira-pira tau lako Mesir, iamotu Elnatan, anakna Akhbor sia ba’tu pira-pirapa to senga’ nasolan lako Mesir.
23Nasolammi sule tu Uria dio mai Mesir anna popennoloi lako datu Yoyakim, anna patei pa’dang na iatu batang rabukna nasua umbaai tama panglamunanna to buda.
24Apa nakarimmanni Ahikam, anakna Safan tu Yeremia, naurungan tae’ nasorongi tau tama limanna to buda la napatei.