Dual PanelRaja ngataken bujur man TUHAN, erkiteken menang perang
1Masmur Daud. Pujilah TUHAN sekawalku, IajariNa aku lako erperang, dingen IsikapkenNa aku ertempur.
2Ia kap pengawal dingen pembelangku, inganku cilinggem ras si engkelini aku. Ia me ampang-ampang inganku cicio, Ia si erbahanca bangsa-bangsa nembah mungkuk man bangku.
3O TUHAN, ise kin manusia maka IpergermetkenNdu ia? Ise kin ia maka IperdiatekenNdu ia?
4Pergeluh manusia e desken sekali erkumesah kap ngenca, desken awih si mentas saja.
5O TUHAN, caingken min langit jenari nusur min Kam, kuit min deleng-deleng maka reh gebukna.
6Kencerken min KilapNdu maka huntak ImbangNdu kerina, pulahi min anak PanahNdu gelah lanai ietehna perkiamna.
7Dadaken min TanNdu i Surga nari, pulahi min aku, angkat aku i bas lawit si mbages nari. Tangtangi aku i bas kuasa bangsa si deban nari,
8si la nggo pernah ngataken si tuhu dingen nggit melasken sumpah palsu.
9O Dibata kuendesken ateku ende-enden si mbaru, aku ngkuit kulcapi dingen rende man BaNdu.
10IberekenNdu kemenangen man raja-raja, suruh-SuruhenNdu Daud IpulahiNdu.
11Kelini min aku i bas musuh si kejam nari, pulahi min aku i bas kuasa bangsa si deban nari, si langa pernah ngataken tuhu, dingen nggit melasken sumpah palsu.
12Anak-anak kami tupung anak perana, balilah min desken batang kayu si turah alu megegeh. Janah anak-anak kami si diberu tupung singuda-nguda, jadilah desken tiang si ihias i bas suki-suki istana.
13Bahanlah gudang-gudang kami dem isina, alu ulih juma si melala erbagena. Bahanlah min biri-biri kami i mbal-mbal, meribu-ribu buena.
14Jadilah maka merih lembu kami, dingen la lit si bene dingen la lit si keguguren. Ula min lit kalak si kelsehen, i bas dalin-dalin kuta kami.
15Malem ate bangsa-bangsa si bage, malem ate kalak si erDibataken TUHAN.