Alkitab Mobile SABDA
[VER] : [KARO]     [PL]  [PB] 
 <<  Pengkhotbah 3 >> 

Sinasa lit erpaksa-paksa kap

1Sinasa lit i bas pertibi enda jadi i bas paksana.

2Dibata kap si netapkenca paksa tubuh ntah pe paksa mate, paksa ngambur benih dingen paksa ngeruahi,

3paksa munuh bage pe paksa pepalem, paksa ngerontasi bage pe paksa majekken.

4Lit paksa erceda ate dingen paksa meriah, paksa ndele ate bage pe paksa landek meriah,

5paksa mibit ras paksa la banci mibit, paksa ngema ras paksa la banci ngema.

6Lit paksa kebenen dingen paksa ndatkenca, paksa pepulungken dingen paksa ngamburken,

7paksa ngerigatken dingen paksa njemuri, paksa sinik bage pe paksa ngerana.

8Lit paksa encidahken keleng ate bage pe paksa encidahken nembeh ate, paksa perang dingen paksa dame.

9Kai kin untungta latih gia kita?

10Kueteh maka Dibata si merekenca dahin makana kote kita.

11Ia nge si mereken kai pe i bas paksa si payo. Ia nge si mereken man banta kerincuhen lako meteh warinta si pepagi, tapi la pernah IberekenNa man banta kepuasen lako ngertiken PerbahanenNa.

12Kueteh maka la lit si terulin man banta seakatan ersenang-senang janah ngenanami kesenangen kegeluhen enda asa umur geluhta.

13Kita kerina banci man dingen minem janah ermeriah-meriah ngenanami kerina ulih latihta. Kerina e pemere Dibata kap.

14Kueteh maka kerina perbahanen Dibata tetap rasa lalap seh rasa lalap. Manusia sitik pe la ngasup engkurangi ntah nambahisa kai si ibahan Dibata e. Bage perbahanen Dibata, gelah malang kita man BaNa.

15Si jadi genduari bage pe si jadi pagi, nai pe nggo me jadi. Dibata nge si njadikenca kasa kai si nggo jadi janah jadi ka pagi mulihi.

Kini la bujuren i babo pertibi enda

16Lit ka si kuidah i bas pertibi enda eme: aturenna lit i je kinibujuren dingen kiniulin, tapi i je nge lit kejahaten.

17Rukur aku, Dibata kap si ngerunggui kalak bujur ras kalak jahat, sabap kai pe ras perbahanen si kuga pe jadi i bas paksa si nitentuken Dibata.

18Rikutken pengakapku maka Dibata nguji kita lako ncidahken labo lit lainna kita ras rubia-rubia.

19Sabap kai si jadi man rubia-rubia e ka nge jadi man manusia. Rubia-rubia mate, bage ka nge pe manusia. Rubia-rubia ras manusia duana tinepa Dibata kap. Dage labo ulin manusia asangken rubia-rubia, sabap duana nggeluh sia-sia.

20Labo lit lainna ingan si itujuna, eme abu. Asalna i bas abu nari janah mulihken ka nge ia ku abu.

21Labo sieteh, ntah kesah manusia nangkih ku das tah pe kesah rubia-rubia nusur ku teruh taneh.

22Erkiteken si e kugejapken maka la lit si terulin seakatan nggeluh ermeriah-meriah ngenanami ulihta latih. Sabap eme sikerajangenna. Kutera pe labo banci ietehna kai denggo jadi kenca nggo mate.


  Share Facebook  |  Share Twitter

 <<  Pengkhotbah 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran