Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 13 >> 

Parpapansing bani Ganup Bunga Tubuh

1Dob ai nini Jahowa ma dompak si Musa sonon,

2“Papansing ma Bangku ganup bunga tubuh na parlobei luar hun parnaibataan i tongah-tongah ni halak Israel, humbani jolma pakon humbani pinahan, Ahu do simada ai.”

3Jadi nini si Musa ma dompak bangsa ai, “Ingat nasiam ma ari on, parluar nasiam hun Masir, hun rumah parjabolonan, ai marhitei tangan na gogoh do ipaluar Jahowa nasiam hunjai; ulang ipangan nasiam na niigaran.

4Sadari on do nasiam luar bani bulan Abib.

5Anjaha ia dob das nasiam ibobahon Jahowa hu tanoh ni halak Kanaan, Heti, Amori, Hewi pakon Jebusi, na dob binulawankon-Ni hubani ompung nasiam, mamberehon bani nasiam tanoh habaoran ni dadih pakon manisan, sai horjahon nasiam ma horja on bani bulan on.

6Pitu ari ma panganon nasiam ruti na so niigaran, anjaha bani ari papituhon ma pesta bani Jahowa.

7Ruti na so niigaran ma panganon bani na pitu ari ai, seng bulih idahon bani nasiam ruti na niigaran, anjaha seng bulih idahon bani nasiam na migar bani sab gomgoman nasiam.

8Patugah ma hubani anakmu bani ari ai sonon, ʻHalani na binahen ni Jahowa do on bangku sanggah parluarhu hun Masir.

9Gabe partandaan ma in bam i tanganmu anjaha gabe pardingatan i holangkolang ni matamu, ase ibagas pamanganmu titah ni Jahowa, ai Jahowa do mambobahon ho luar hun tanoh Masir marhitei tangan na gogoh.

10Maningon horjahononmu ma titah on bani parjumpah ni panorangni ganup tahun.”

11Ia dob das ho iboban Jahowa hu tanoh ni halak Kanaan songon na dob binulawankon-Ni bam pakon hubani ompungmu, anjaha iberehon ai bam,

12maningon ondoskononmu ma hubani Jahowa sagala anak na parlobei luar hun partapaan; sagala tunggal bunga tubuh ni pinahanmu Jahowa do homa simadasi.

13Tapi sagala bunga tubuh ni halode maningon tobusonmu do marhitei anak ni biribiri, atap anggo seng tobusonmu ai, maningon ponggolhononmu do borgokni. Sagala bunga tubuh ni jolma i tongah-tongah ni anakmu maningon tobusonmu do.

14Anjaha anggo isungkun anakmu ho magira, “Aha do on? Jadi hatahon ma bani: Marhitei tangan na gogoh ibobahon Jahowa do hanami luar hun Masir, hun rumah parjabolonan.

15Ai sanggah na manendel Parao palopas hanami laho, jadi ibunuh Jahowa ma sagala bunga tubuh i tanoh Masir, humbani bunga tubuh ni jolma nari das hubani bunga tubuh ni pinahan. Halani ai do ase hugalangkon sagala bunga tubuh tunggal hubani Jahowa, tapi sagala bunga tubuh i tongah-tongah ni anakku hutobus do.

16Bahen partandaan ma in ibagas tanganmu anjaha bahen pardingatan i holangkolang ni matamu, ai marhitei tangan na gogoh do Jahowa paluarhon hanami hun Masir.”

Pardalan i Halimisan das Ronsi Laut Sigerger.; Hombun pakon Apuy na Jongjong

17Dob ilopas Parao bangsa ai laho, seng ibobai Jahowa sidea hun dalan na hun tanoh ni halak Palistim age pe dohoran do ai; ai nini Naibata do, “Atap manosal holi bangsa in anggo ididah hamunsuhon, gabe mulak sidea holi hu tanoh Masir.”

18Halani ai maringgot ma bangsa ai ibobahon Jahowa hun dalan na hu halimisan dompak Laut Sigerger, anjaha marsinjata bei do halak Israel tangkog hun tanoh Masir.

19Iboban si Musa do homa holiholi ni si Josep, ai ipabija hinan do halak Israel, nini do, “Sai na parayakon ni Naibata do nasiam, jadi boban nasiam ma holiholingku hunjon.”

20Jadi misir ma sidea hun Sukot, anjaha marsaran ma sidea i Etkam bani topi ni halimisan ai.

21Anjaha Jahowa do mardalan i lobei ni sidea, arian marhitei hombun na jongjong mambobahon sidea i dalan ai, ia borngin marhitei apuy na jongjong bahen suluh bani sidea, ase boi sidea mardalan arian pakon borngin.

22Seng ongga meret hombun na jongjong ai arian, pakon apuy na jongjong ai borngin humbani bangsa ai.


  Share Facebook  |  Share Twitter

 <<  Keluaran 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran