Dual PanelPenggauran kalle-kalleanNa Puang Matua tonna tassu’ tu to Israel lan mai Mesir
1Iatonna tassu’ tu to Israel lan mai Mesir. Sia tonna tipoli’ tu bati’na Yakub lan mai bangsa ma’laen basa,
2Yehuda tu Napoinan maindan, sia Israel tu Napopanglisuan parenta.
3Mallaimi tu tasik tonna tiroi tu iannato, sia lolong sule tu Yordan;
4Iatu mintu’ buntu tibuang len susi domba laki, sia iatu mintu’ tanete ten to anak domba.
5E tasik, ma’aparoko ammu mallaira susito? Sia iko, e Yordan, ammu lolong sulera?
6E kamu buntu, ma’aparokomi ammi tibuang-buang len susi domba laki? Sia e kamu tanete ammi tenra anak domba?
7Rumontingko dio olona Puang, e lino. Dio olona Kapenombanna Yakub,
8tu mangka umpopembali likui tu buntu, sia batu laiya Napopembali kalimbuang.