Alkitab Mobile SABDA
[VER] : [KARO]     [PL]  [PB] 
 <<  Amos 6 >> 

Israel ikernepken

1Cilaka me kam, o kam si nggeluh alu senang i Sion. Bage ka pe kam si nggeluh alu teneng i Samaria, kam kalak si mbelin i bas bangsa Israel si mbelin, kam si jadi ingan pengadun jelma si nterem!

2To perdiateken kota Kalne. Kenca bage terusken ku kota Hamat si mbelin e, jenari ngincuah ku kota Gat kota kalak Pilisti. Ulin kin kota-kota e asangken kerajan Juda ras Israel? Belangen kin daerahna asa negerindu?

3La kam nggit ngakuisa maka wari kecedan nandangi reh; tapi arah perbahanenndu, wari kecedan e reh pedasna ibahanndu seh.

4Bene me kam, o kam si medem-medem alu senang i bas bale-bale gading si meherga janahndu mangani daging lembu ras anak biri-biri!

5Rende-rende kam janah ngkuit kulcapi bali ras Daud nai.

6Iinemndu anggur, dem piga-piga mangkuk, janah ipakendu minak wangi si merimna, tapi la ceda atendu kerna kecedan si jadi man Israel.

7Erkiteken si e kam me si pemenana ibaba ku pembuangen. Pesta-pesta ras kerja-kerjandu nandangi peltep me.

8TUHAN si Erdolat si Mada Kuasa nggo ersumpah nina, "Segat ateKu keganjangen ukur bangsa Israel; rumahna si mbelin dingen mejile ciga ateku. Ibukotana ras kasa kai isina Kubereken me man musuh."

9Adi lit denga si sepuluh kalak sada rumah, mate me ia.

10Kade-kade si mate e, eme kalak si ertugas ngkuburkenca, maba bangke e ndarat i rumah nari. Kenca bage erlebuh ia man kalak si tading i bas rumah e nina, "Lit denga kalak si nggeluh i jena?" Ngaloi ia nina, "Lang!" kenca bage nina kade-kadena ndai, "Sipken! Ula kari terbelasken kita gelar TUHAN."

11Tupung ibelasken TUHAN perentah e, subuk rumah mbelin tah kitik, kerina iripukken seh getem.

12Banci kin kuda irattuh arah batu-batu? Banci kin itenggalai kalak lawit alu lembu? Tapi kam nggo isalihkenndu kebujuren jadi racun, si benar jadi salah.

13Imegahkenndu kal kerna kota Lodebar si nggo ikuasaindu. Nindu, "Kota Karnaim idat kami perban megegeh kami."

14TUHAN, Dibata si Mada Kuasa ngatakenca nina, "O bangsa Israel, Kusuruh me bangsa si deban engkuasai negerindu. Itindasna me kam mulai i Hamat nari i Utara terus ku baluren Araba i Selatan."


  Share Facebook  |  Share Twitter

 <<  Amos 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran