Alkitab Mobile SABDA
[VER] : [MEYAH]     [PL]  [PB] 
 <<  2 Korintus 3 >> 

1Didif danggot mar erek insa koma, jefeda iwa imosujohu rot oida didif disitit rot disinsa dufoka ojgomu ei. Beda iwa tein isujohu rot oida teinefa fogora memef meneita surat egens jeska ebirfager rineya ongga anggot rot mefmen meita mar jah ifekesa sis fob gurei. Yo, rasul-rasul ebireira ongga riker gu ifekesa rudou os rita surat erek koma jeskaseda risitit risinsa rifaga rot ojgomu.

2Tina memef modou os jeskaseda yeyin ita mar ongga oufamofa bera ongga orocunc rot oida memef moftuftu iwa rot tenten fob. Jefeda enadaij nou memef tein mita surat egens ongga anggot rot mar erek koma jinaga guru.

3Erek koma tein, iwa bera erek surat egens ongga Yesus Kristus onggu fob. Noba Ofa ensa surat koma skoita rusnok oisouska memef ongga moftuftu iwa rot efen oga erek rasul-rasul fob. Jeska erek rusnok rik rot yeyin ita mar ongga oufamofa, beda rudou emebriyi gij rot teinefa Yesus Kristus omfij iwa fob. Noba oisouska Efena Ebsi bera Allah omfij iwa fogora iwa inroru Ofa rot tenten fob. Noba efen oga insa koma bera angh gij idou efesi rot ahais ojgomu, erek mar ongga rusnok runggu gij mamu efebr ongga angh rot ahais.

4Didif dagot mar erek insa koma jeska modou ejginaga rot tenten oida oisouska modou ongga egens jera Yesus Kristus bera Allah omocunc rot oida mar insa koma bera erek tenten ojgomu.

5Noba enadaij nou memef magot rot oida memef montunggom mar insa koma nomnaga oisouska mesinsa mefmen owesa efek jinaga guru. Jeska mar nomnaga ongga montunggom insa koma fob bera oisouska Allah efen owesa efek ojgomu.

6Ofa bera ongga eita owesa efek gu memef jeskaseda moftuftu rusnok rot efen oga. Noba memef monoftuftu rot oida rusnok ruroru hukum-hukum Musa ongga ofa onggu rot sis fob guru. Jeska mar koma bera eneita eiteij ah ongga efeinah guru. Tina memef moftuftu rot mar ongga efeinah ongga Allah anggen rot sis fob. Koma bera rot teinefa rusnok risma eiteij ah ongga efeinah oisouska Efena Ebsi Allah ojgomu.

7Hukum-hukum insa koma ongga Allah eita gu Musa sis fob bera rusnok runggu tumu mamu efebr fob. Noba hukum-hukum koma bera erek mar ongga efen efesa eteb, jeska rusnok rimeesa rot noba ruroru jeni ojgomu. Noba gij mona ongga Musa ensma hukum-hukum insa koma jeska Allah fob, beda Musa efen osum eja erek efesa eteb rot mar onswos ongga Allah eita gu ofa gij mona insa koma. Noba ofa efen efesa insa koma esiri deci deci, tina enadaij nou rua ongga Israel rik efen osum erek dektek guru, jeska efen efesa eteb ros. Erek koma tina, hukum-hukum ongga onswos insa koma bera ongga agot rot oida rusnok ragos rot rerin mar ongga oska ojgomu.

8Tina Efena Ebsi ongga Allah eita gu mimif fob bera efen efesa eteb ekirsa deika jeska hukum-hukum insa koma ojgomu. Jeska Efena Ebsi koma bera ongga eita eiteij ah ongga efeinah gu rusnok.

9Erek rusnok rusujohu rot oida hukum-hukum insa koma ongga agot rot oida rusnok ragos ojgomu bera erek mar ongga efen owesa efek eteb, beda mar ongga Efena Ebsi otunggom bera efen owesa efek ongga eteb ekirsa deika. Jeska oisouska Efena Ebsi ongga angh gij mudou efesi bera Allah osujohu rot oida mifmin mar ongga oska oskiyai tein enah gij mudou efesi deika guru.

10Noba mar ongga Efena Ebsi ontunggom ebeibeyaif nou mimif bera efen owesa efek eteb ongga ekirsa deika ojgomu. Jefeda hukum-hukum insa koma efen owesa efek ongga ensiri ojgomu fob.

11Erek koma tein, hukum-hukum insa koma ongga angh reirei bera efen owesa efek ongga eteb. Tina mar ongga Efena Ebsi Allah ontunggom bera efen owesa efek eteb ekirsa deika ojgomu. Jeska mar koma bera emah rot ah aibin ojgomuja.

12Erek koma jefeda memef moisum gij mar ongga Efena Ebsi ontunggom nou mimif fob fogora moku mofos rot ojgomu noba moftuftu rot Allah efen oga ojgomuja.

13Noba memef menedemi mar ongga motunggom insa koma guru. Jeska sis fob, Musa ef meifeti joug osum jeskaseda rua ongga Israel rinek efen efesa insa koma ongga ensiri deci deci fob guru.

14Noba rua ongga Israel bera rudou ombrera ojgomu noba rudou enebriyi gij Allah oga efen ofou jinaga guru. Noba erek deisef tein, gij mona ongga rusnok Yahudi rik gij Mar Efeyi Ebsi, beda rudou enebriyi gij mar koma efen ofou rot tenten guru. Koma erek meifeti insa koma ongga of joug riteij ros. Noba erek rusnok ruroru Yesus Kristus rot tenten ojgomu fob, beda koma erek ribes meifeti insa koma jeska riteij fob.

15Erek koma jeska gij mona ebeibeyaif tein, nou ongga rusnok Yahudi rik gij Mar Efeyi Ebsi rot hukum-hukum Musa, beda rua rusujohu rot oida rimesma eiteij ah ongga efeinah oisouska Hukum insa koma ojgomu. Koma erek meifeti insa koma ongga angh joug riteij ros.

16Tina erek rusnok rikikif jeska mar ongga rua rusujohu rot erek insa koma fogora ruksons skoita Tuhan, beda rudou emebriyi gij Allah oga efen ofou si. Koma bera erek rusnok ongga ribes meifeti ongga angh joug riteij fogora rik mar rot koisoisa deika ojgomu.

17Noba Tuhan insa koma ongga rua ruksons skoita bera morototuma erek Efena Ebsi ongga eita eiteij ah gu rusnok. Jefeda rusnok ongga Efena Ebsi engker gij rudou efesi fob bera runsuwa jeska hukum-hukum insa koma ojgomu fob.

18Noba mimif ongga Kristen bera erek rusnok ongga rinaha meifeti joug rusum deika guru. Jefeda rusnok enjgineg rimek Tuhan efen owesa efek ongga angh gu mimif. Noba Efena Ebsi Tuhan bera ongga otunggom mar gij mudou efesi odudu deika jeskaseda mimif misma owesa efek ongga oufamofa erek Ofa efen owesa efek ongga oufamofa.


  Share Facebook  |  Share Twitter

 <<  2 Korintus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel