Dual Panel1Ri se’reang allo, nia’mo siapa are tau battu ri Zif battu mange ri Saul ri Gibea na napauang angkanaya niaki Daud accokko ri Moncong Hakhila ri birinna parang lompona Yehuda.
2Jari akkaro-karomi Saul a’lampa nirurungang ri tallussa’bu tantara kaminang bajika ri Israel, mange ri parang lompo Zif untu’ amboyai Daud.
3Appare’mi kema Saul ri biring agang rampi’na Moncong Hakhila. Daud, ia niaka ri parang lompoa, nalangngere’mi kabara’na angkanaya nipinawangi ri Saul sa’genna ri parang lompoa.
4Jari akkirimmi mata-mata, sa’genna naassemmo angkana ma’nassa niaki Saul anjoreng.
5Akkaro-karomi Daud a’lampa mange ri tampa’ kemana Saul. Na nagappamo kema napammantangia Saul sitabanga attinro ri ampi’na Abner ana’na Ner. Anjo kemana Saul niaki ri tangnga-tangnga, nampa tantarana akkemai akkuliling.
6Nampa akkuta’nammo Daud ri Ahimelekh, anjo tu’ Het, kammayatompa mae ri Abisai sari’battanna Yoab (Amma’na ke’nanga iamintu Zeruya), angkana, "Inai barani angngaganga antama’ ri kemana Saul?" Appialimi Abisai angkana, "Inakke!"
7Jari anjo bangngia Daud siagang Abisai antama’ cokko-cokkomi ri anjo kemaya na narapikammo Saul sitabang attinro ri tangnga-tangngana kemaya. Pokena tattintingi ri buttaya ri ampi’ ulunna. Abner siagang pasukanna attinroi angkulilingi Saul.
8Nakanamo Abisai ri Daud, "Napassareammi Allata’ala musunnu anne bangngia mae ri kau. Pa’biamma’ nakupokei siagang poke kalenna sa’genna attimbusu’ naung ri buttaya, sikalimo bawang kucoka, teami napinruang!"
9Mingka nakanamo Daud, "Teako apa-apai! Musti Nahukkungi Batara tau a’gau’ ja’dalaka mae ri karaeng Napilea.
10Lanri Batara mattallasaka, kuassengi angkanaya sallang KalenNa Batara lambunoi Saul, punna narapi’mo a’jala’na, yareka punna matei lalang bundu’.
11Tapporo Napisangkaia’ Batara ambunoi karaeng Napilea! Alle bawammi pokena siagang pammoneang je’ne’na, nampa ki’lampa!"
12Jari naallemi Daud pokena Saul siagang pammoneang je’ne’na battu ri ba’leang ulunna Saul, nampa a’lampa. Tena manna sitau anciniki anjo kajarianga yareka angngassengi anjo passalaka, yareka ambangung, nasaba’ nipa’jari jannang ngasengi tinrona ke’nanga ri Batara.
13Nampa a’limbammo Daud anta’leang ri biring lappara’ maraenganga sa’genna ri cappa’ monconga, sa’genna bella battu ri kemana Saul.
14Nampa ammarrang Daud mae ri Abner siagang tantarana Saul angkana, "Abner! Nulangngere’ji sa’rangku?" Ammarrang tommi Abner angkana, "Inaiko antu akkiok-kio’ kamma?"
15Appialimi Daud angkana, "Abner, sai ikau kaminang heba’ ri Israel? Angngapa natena nujagai pinggawanu, iamintu karaenga? Silalonna nia’ tau ampantamakki kemanu ero’ ambunoi karaennu.
16Tena nusanggu’ anggaukangi tugasa’nu Abner! Lanri Batara mattallasaka, ikau ngaseng siratangko nibuno, lanri tena nanujagai karaennu, karaeng Napilea Batara. Ciniki sai, kemaei pokena karaenga? Kemaei pammoneang je’ne’na niaka ri ba’leang ulunna sumpaeng?"
17Naassengi Saul sa’ranna Daud. Jari akkuta’nammi angkana, "Daud, ikauka antu anakku?" Appialimi Daud angkana, "Iye’, karaeng."
18Nampa nakana pole, "Angngapa natuli kiondangija atanta karaeng? Apa kutadeng kasalanna atanta?
19O, karaeng, kipilangngeri sai sombanna anne atanta. Ebara’ angkana Batara assuroi karaengku angngewai atanta, akkullei passare koro’banga ampanaungi pangngalarroinNa mae ri atanta. Mingka ebara’ angkana rupatau ansuroi karaengku, tapporo nihukkung laloi ke’nanga ri Batara! Nasaba’ lanri panggaukanna anjo ke’nanga nanibongkamo atanta battu ri buttaNa Batara, siagang tarpassa musti a’lampai mange ri pa’rasangang maraeng namusti anynyomba anjoreng atanta mae ri rewata-rewata tenaya niassengi.
20Teaki’ balang parekangi atanta mate ri butta maraenga, bellaya battu ri Batara. Apa matu-matunna karaeng Israel battu untu’ ammuno sikayu kutu sangkamma anne atanta? Apa matu-matunna angngondangi atanta anne, sanrapang tau angngondanga jangang romang?"
21Appialimi Saul angkana, "A’gau’ dorakama’. Daud, ammotere’ mako ana’! Tenamo nakula’gau’ ja’dala’ mae ri kau, lanri nurellakanga’ attallasa’ ri bangngia. Tolo sikali panggaukangku. Lingu tojeng-tojemma’ nakke!"
22Mingka appialimi Daud angkana, "Annemi poketa karaeng, assuro maki’ sitau tantarana karaengku battu mae angngallei.
23Batara lambarakkaki sikamma tau tamamminraya siagang lambusuka pa’mai’na. Nasaba’ manna pole anne alloa Napasasareammi Batara karaengku mae ri atanta, mingka taerokai atanta a’gau’ ja’dala’ mae ri karaengku, karaeng nipilea ri Batara.
24Jari, sangkamma batena atanta, anne alloa narellakammi karaengku attallasa’, kamma tomminjo tapporo nikatutui anne atanta ri Batara siagang nilappassang battu ri sikontu bahayaya!"
25Nampa nakanamo Saul ri Daud, "Nabarakkakiko Batara, anakku! La’wasselekko lalang sikontu jama-jamannu!" Nampa napatulusu’mo jappana Daud. Kammayatompa Saul ammotere’ tommi mange ri balla’na.