Dual Panel1Ri matenamo Yosua, akkuta’nammi umma’ Israel ri Batara angkana, "Batara, suku kereangami musti appakkaramula a’lampa mange ambunduki tu Kanaan?"
2Appialimi Batara, "Suku Yehuda. Le’ba’mi Kusare koasa ke’nanga untu’ angngallei anjo pa’rasanganga."
3Nakanamo suku Yehuda mae ri suku Simeon, "Bantuki’ ambunduki tu Kanaan na nanirampasa’ daera le’baka Natantukang Batara untu’ ikambe. Sallang nalakibantu tongko untu’ anrampasaki daera le’baka Natantukang Batara untu’ ikau ngaseng suku Simeonga. Jari a’lampami suku Simeon
4siagang suku Yehuda mange a’bundu’." Na nisaremo ke’nanga pakkulle battu ri Batara sa’genna nabetamo tu Kanaan siagang tu Feriska. Nia’ sampulo sa’bu tantarana musua mate ri Bezek.
5Narapikang tommi siagang nabundukimi tommi ke’nanga karaenna anjo pa’rasanganga, niarenga Adoni-Bezek.
6Nalarimo anjo karaenga. Mingka niondammi ri ke’nanga, sa’genna narapi’ na najakkala’. Nampa napolong ke’nanga anrong limanna siagang anrong bangkenna.
7Angkanami Adoni-Bezek, "Riolo nia’ tujupulo karaeng le’ba’ kupolong anrong limanna siagang anrong bangkenna; nampa kusare ke’nanga angkanrei sesa-sesa kanre tu’guruka battu ri mejangku. Kamma-kamma anne Nagau’ma’ Allata’ala sangkamma apa le’baka kugaukang mae ri ke’nanga." Nierammi Adoni-Bezek mange ri Yerusalem. Nanjoremmo mate.
8Nabundukimi tu Yehuda kota Yerusalem. Na narampasa’ siagang natunumi ke’nanga anjo kotaya. Kammayatompa nabuno tommi tuma’buttana.
9Le’baki anjo a’lampami pole ke’nanga ambunduki tu Kanaan, ia ammantanga ri daera monconga siagang ri bulu’-buluka, kammayatompa nabunduki tommi tuniaka ammantang ri daera kalotoroka buttana ri timborangang,
10kammaya pole kota Hebron, iamintu kota niarenga Kiryat-Arba riolo. Anjoreng nabetami tu Yehudaya iamintu tu Sesai, tu Ahiman siagang tu Talmai.
11Battu ri Hebron a’lampami tu Yehudaya ambunduki tuniaka ri kota Debir, ia niarenga Kiryat-Sefer anjo wattua.
12Nia’mo se’re tu Yehuda, iamintu niarenga Kaleb, angkana, "Inai-nai akkulle ambetai Kiryat-Sefer, akkullei assialle siagang ana’ tubaineku iamintu Akhsa."
13Naia ambetayai anjo tuniaka ri anjo kotaya, iamintu Otniel, ana’nai tu niarenga Kenas, andi’ kalenna Kaleb. Jari napassareammi Kaleb anjo ana’ tubainena a’jari bainenna Otniel.
14Riallo pa’buntinganna, nisuromi Akhsa ri Otniel, sollanna appala’ sipammantangang tampa’ battu ri manggena. Jari naummi Akhsa battu ri keledaina, salaku pammatei angkana nia’ lanapala’. Nikuta’nammi ri Kaleb angkanaya apa nakaeroki.
15Appialimi Akhsa angkana, "Erokka’ siapa are jaina timbuseng je’ne’ nasaba’ anjo tampa’ napassareanga manggeku mae ri nakke, niaki ri daera kalotoroka buttana." Jari nisaremi ri Kaleb timbuseng je’ne’ niaka ri cappa’ ratena binanga siagang timbuseng je’ne’ niaka ri cappa’ rawana binangaya.
16Ia turunganna matoang bura’nena Musa, iamintu tu Keni. Amminawangi ke’nanga ri tu Yehudaya assulu’na battu ri kota Yerikho, niarenga kota Kurma. Nampa a’lampa ke’nanga mange ri daera tenaya coppong buttana, niaka ri timboranna Arad ri pa’rasangang Yehuda. Ammantammi ke’nanga ri tangnga-tangngana tuma’buttaya anjoreng, niarenga bansa Amalek.
17Nampa siagammo suku Simeon anjo suku Yehudaya mange ambunduki tu Kanaan niaka ammantang ri kota Zefat. Na nabetamo ke’nanga tuniaka ri anjo kotaya. Natunrami ke’nanga anjo kotaya nampa napa’jari ancuru’, nampa naareng Horma, (battuanna kaancurang).
18Nitulummi tu Yehudaya sa’genna akkulle nabeta passa daera niaka ri moncong-monconga. Mingka takkulleai nabeta ke’nanga kota Gaza, Askelon, yareka pole Ekron siagang sikamma daera niaka ri tammulilina. Saba’na kaanjo bansa-bansa niaka ri biring tamparanga nia’mo kareta-kareta bassina, untu’ napake a’bundu’. Jari takkulleai tu Yehudaya angngondangi ke’nanga.
19(1:18)
20Nipassareammi kota Hebron mae ri Kaleb situru’ parentana Musa. Saba’na kariolo nia’ tallu golongang turunganna Enak le’ba’ nabongka Kaleb assulu’ battu ri anjo kotaya.
21Na suku Benyamin takkulleai nabongka tu Yebuska assulu’ battu ri kota Yerusalem. Iaminjo saba’na natuli sipammantangang tu Yebus siagang tu Benyamin.
22Ia turungang battua ri Yusuf, iamintu suku Efraim siagang suku Manasye, a’lampai ke’nanga mange ambunduki tu niaka ri kota Betel, niarenga kota Lus anjo wattua. Na nitulummo ke’nanga ri Batara. Ri wattunna nisuro mata-mataya mange ri anjo kotaya,
23(1:22)
24sibuntuluki ke’nanga siagang sitau bura’ne battua ri anjo kotaya. Nakanamo ke’nanga ri anjo taua, "Punna erokko antulungi ikambe ampantamai anjo kotaya, lakigau’ bajikko sallang."
25Nipaccinikkammi ke’nanga ri anjo taua agang antamaya ri anjo kotaya. Antama’mi tu Efraim siagang tu Manasye ri anjo kotaya. Na nabuno ngasemmo tuma’buttana, pantarangang anjo taua sumpaeng siagang bija pammanakanna.
26A’lette’mi anjo taua mange ri pa’rasangang Het nampa ambangung se’re kota anjoreng na naareng Lus. Tuli kammana anjo arenna anjo kotaya.
27Ia tenaya nibongkai ri suku Manasye iamintu tuniaka ri kota Bet-Sean, Taanakh, Dor, Yibleam, Megido siagang sikamma kampong-kampong niaka ambani. Jari ammantangiji tu Kanaan anjoreng.
28Memang ri pila’ katambannamo kassa’na tu Israelka napassami tu Kanaan ampanjama-jamangi ke’nanga. Mingka tena nanabongkai tabasikali ke’nanga anjo tu Kanaan battu anjoreng.
29Anjoreng ri kota Gezer, tena nabongkai suku Efraim tu Kanaan niaka ammantang ri anjo kotaya. Jari ammantangiji tu Kanaan anjoreng sipammantangang ke’nanga.
30Tuniaka ammantang ri kota Kitron siagang Nahalol, tena todong nanibongkai ri suku Zebulon. Iaminjo saba’na natuli ammantangija bansa Kanaan anjoreng sipammantangang ke’nanga. Mingka nipassami anjo tu Kanaan ampanjama-jamaangi ke’nanga.
31Tuniaka ammantang ri kota Ako, Sidon, Ahla, Akhzib, Helba, Afek siagang Rehob, tena todong nanibongkai ri suku Asyer.
32Iamintu saba’na natuli ammantangija tu Kanaan, iamintu tau appokoka anjoreng ri pa’rasanganga, sipammantangang siagang tu Asyer.
33Tu niaka ammantang ri kota Bet-Semes siagang Bet-Anat, tena todong nanibongkai ri suku Naftali. Iaminjo saba’na natuli ammantangija tu Kanaan, iamintu tau appokoka anjoreng ri pa’rasangangnga, sipammantangang siagang tu Naftalia. Mingka nipassai ke’nanga ampanjama-jamaangi tu Naftalia.
34Bansa Amoria tuli ammantangiji ri kota Ayalon, Saalbim siagang Moncong Heres, nasaba’ nidesaki tu Dan ri ke’nanga nai’ ri daera monconga. Tena nilappassangi ke’nanga naung ri daera lapparaka. Mingka tuli nijallakkangi anjo bansa Amoria ri suku Efraim siagang suku Manasye, kammayatompa nipassai ke’nanga ampanjama-jamaangi anjo ruaya suku.
35(1:34)
36Warakkanna kota Sela, iaminjo pa’baeng-baenna tu Amoria, allalo ri Pangngambikang Akrabim.