Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 40 >> 

Ipajongjong si Musa Lampolampo Partumpuan

1Dob ai nini Jahowa ma dompak si Musa,

2“Bani ari sada bulan sada maningon pajongjongonmu do ianan na pansing, lampolampo partumpuan ai.

3Maningon nahkononmu do hujai poti hasaksian ai, anjaha lingodkononmu poti ai bani tirei ai.

4Maningon boanonmu do meja ai hubagas, anjaha aturonmu siaturonkon i atasni, anjaha maningon boanonmu do parsuluhan ai hubagas anjaha pannahkononmu suluh ai hujai.

5Maningon pajongjongonmu do anjapanjap pardahupaan omas ai i lobei ni poti hasaksian ai, anjaha tirei ai maningon gantungkononmu do i lobei ni labah ni ianan na pansing ai.

6Maningon pajongjongonmu do anjapanjap panggalangan ni galangan situtungon ai i lobei ni labah ni ianan na pansing, lampolampo partumpuan ai.

7Maningon pajongjongonmu do tong parburihan ai i holangkolang ni lampolampo partumpuan ai pakon anjapanjap ai, anjaha nahkon ma bah hubagas.

8Maningon paulionmu do alaman ai inggot, anjaha gantungkononmu tirei i lobei ni horbangan ni alaman ai.

9Dob ai buat ma minak pamminaki ai, minaki ma ianan na pansing ai pakon ganup na adong ibagas, anjaha urasi ma ai pakon haganup parugasni, ase gabe pansing ma ai.

10Maningon minakanmu do anjapanjap panggalangan ni galangan situtungon ai pakon haganup parugasni, maningon urasonmu do anjapanjap ai, ase gabe pansing sahalian anjapanjap ai.

11Maningon minakanmu do tong parburihan ai pakon onjolanni, maningon urasonmu do ai.

12Dob ai boan ma si Aron pakon anakni ai roh hun dohor hu labah ni lampolampo partumpuan ai, anjaha burihi ma sidea bani bah;

13sorungkon ma hubani si Aron pakean na pansing ai, minaki ma ia anjaha urasi ma ia, ase ia mangkorjahon hamalimon Bangku.

14Boan ma homa anakni ai hun dohor, anjaha sorungkon ma hubani sidea baju parbagas ai,

15anjaha minaki ma sidea songon na mininakanmu bapa ni sidea, ase sidea mangkorjahon hamalimon Bangku; ia pamminakion na bani sidea ai gabe tanda hamalimon do ai bani sidea sadokah ni dokahni torus marsundut-sundut.”

16Jadi ipasaud si Musa ma ganup songon na tinonahkon ni Jahowa hu bani, sonai do ibahen.

17Anjaha bani bulan sada, tahun paduahon, bani ari parlobei ni bulan ai, ipajongjong ma ianan na pansing ai.

18Ipajongjong si Musa ma ianan ai; ibahen ma onjolanni, ipamasuk papanni, ibahen ransang-ransangni anjaha ipajongjong tiangni.

19Ipaherbang ma tenda ni lampolampo ai hu atas ni ianan na pansing ai, anjaha inahkon ma tutup ni lampolampo ai hu atasni, songon na tinonahkon ni Jahowa hubani si Musa.

20Ibuat ma hasaksian ai anjaha inahkon hubagas poti ai, isurukkon ma lanja-lanja ai hubani poti ai anjaha inahkon langkob pardearan ai hu atas ni poti ai.

21Dob ai iboban ma poti ai hubagas ianan na pansing ai, anjaha igantungkon ma tirei ai bahen tutup ni poti hasaksian ai, songon na tinonahkon ni Jahowa hubani si Musa.

22Ipajongjong ma meja ai hubagas lampolampo partumpuan ai hampit lopah parutara ni ianan na pansing ai i darat ni tirei ai,

23anjaha iatur ma ruti i atasni i lobei ni Jahowa, songon na tinonahkon ni Jahowa hubani si Musa.

24Ipajongjong ma homa parsuluhan ai ibagas ianan na pansing ai tontang ni meja ai hampit lopah pardangsina ni ianan na pansing ai.

25Inahkon ma suluh ai i atasni i lobei ni Jahowa, songon na tinonahkon ni Jahowa hubani si Musa.

26Inahkon ma anjapanjap omas ai ibagas lampolampo partumpuan ai i lobei ni tirei ai,

27anjaha itutung ma dahupa na misbou i atasni songon na tinonahkon ni Jahowa hinan hubani si Musa.

28Igantungkon ma pakon tirei ai i lobei ni labah ni ianan na pansing ai.

29Tapi anggo anjapanjap panggalangan ni galangan situtungon ai ipajongjong do bani labah ni ianan na mapansing, lampolampo partumpuan ai, anjaha igalangkon ma i atasni galangan situtungon pakon galangan sipanganon songon na tinonahkon ni Jahowa hinan hubani si Musa.

30Ipajongjong ma tong parburihan ai i holangkolang ni lampolampo partumpuan ai pakon anjapanjap ai, anjaha ibahen ma bah hujai bahen parburihan;

31bani bah ai ma iburihi si Musa, si Aron pakon anakni ai tangan pakon nahei ni sidea.

32Anggo masuk sidea hubagas lampolampo partumpuan ai, anjaha anggo roh sidea hun dohor bani anjapanjap ai, maningon marburih sidea, songon na tinonahkon ni Jahowa hinan hubani si Musa.

33Ipauli ma alaman ai inggot ianan na mapansing ai pakon anjapanjap ai, anjaha igantungkon ma tirei ni horbangan ni alaman ai. Jadi sonai ma pardob ni ganup horja ai ibahen si Musa.

Hamuliaon ni Jahowa Manggoki Ianan na Mapansing

34Dob ai roh ma hombun ai manrungkub lampolampo partumpuan ai, anjaha igoki hamuliaon ni Jahowa ma ianan na mapansing ai,

35gabe seng tarbahen si Musa masuk hubagas lampolampo partumpuan ai, ai sorap do i atasni hombun ai, anjaha hamuliaon ni Jahowa manggoki ianan na mapansing ai.

36Layur ibagas pardalanan ni sidea ai, anggo manaik ma hombun ai hun datas ni ianan na pansing ai, bingkat ma halak Israel mardalan;

37tapi anggo seng manaik hombun ai, seng bingkat sidea, das ronsi ari parnaikni ai.

38Ai sai i atas ni ianan na mapansing ai do hombun ni Jahowa ai ia arian, anjaha apuy do i atasni anggo borngin, ipaidah-idah ganup ginompar ni Israel, sadokah pardalanan ni sidea ai.


  Share Facebook  |  Share Twitter

 <<  Keluaran 40 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran