Alkitab Mobile SABDA
[VER] : [MAKASAR]     [PL]  [PB] 
 <<  1 Tawarikh 26 >> 

1Iaminne pambageang tugasa’ untu’ sikamma tu Lewi a’jaria pangawala’na Balla’Na Batara. Battu ri passibijanna Korah ia nijo’joka iamintu Meselemya ana’na Kore battu ri kaluarga Ebyasaf.

2Nia’ tuju ana’na bura’ne ia nicataka situru’ susunang umuru’na ke’nanga, iamintu: Zakharia, Yediael, Zebaja, Yatniel,

3Elam, Yohanan, Elyoënai.

4Nampa nijo’jo’ Obed-Edom. Nibarakkaki ri Allata’ala nanisare sagantuju ana’ bura’ne, ia nicataka situru’ susunang umuru’na, iamintu: Semaya, Yozabad, Yoah, Sakhar, Netaneel,

5Amiel, Isakhar, siagang Peuletai.

6Semaya ana’ toana Obed-Edom, nia’ annang ana’ bura’nena, iamintu: Otni, Refael, Obed, Elzabad, Elihu, siagang Semakhya; yangasenna ke’nanga tau sanna’ niparalluanna lalang bijanna ke’nanga lanri ga’ga baranina, la’biangampa Elihu siagang Semakhya.

7(26:6)

8Untu’ anjo jamang-jamang pangawalaka passibijanna Obed-Edom assarei 62 jaina tau bura’ne kassaka.

9Passibijanna Meselemya assarei sampulo assagantuju jaina tau kassa’.

10Battu ri passibijanna Merari nijo’joki Hosa. Ia nia’ ana’na bura’ne, iamintu: Simri (ia teai ana’ toa, mingka niangkaki a’jari pamimping ri manggena),

11Hilkia, Tebalya, siagang Zakharia. Yangasenna nia’ sampulo antallu jaina anggota kaluarga Hosa ia a’jaria pangawala’na Balla’Na Batara.

12Sikamma pangawalaka ri Balla’Na Batara nibagei lalang pa’rappungang-pa’rappungang situru’ passibijanna ke’nanga. Ke’nanga nisare tongi tugasa’-tugasa’ lalanga ri Balla’Na Batara sangkamma tu Lewi maraengannaya.

13Massing-massing pa’rappungang passibijang ia lompoa yareka ca’dia, ammeso’ ngasengi lomoro’ nigoccang untu’ angngassengi angkanaya ri bageang pakke’bu’ lompoang kereanga mae ke’nanga latugasa’.

14Selemya anggappai pakke’bu’ lompo bageang rayangnganga. Zakharia, iamintu ana’na, tuli assarea pappakainga’ baji’, anggappai pakke’bu’ lompo bageang waraka.

15Obed-Edom anggappai pakke’bu’ lompo bageang timboranga siagang ana’-ana’na anggappa tugasa’ anjagai gudang-gudang pammantangang pakkakasaka.

16Supim siagang Hosa anggappai pakke’bu’ lompo bageang laukanga siagang pakke’bu’ Syalekhet ia niaka ri oloang pangngambikanga. Ia tugasa’ pangawalaka niatoro’ kammai anjo sa’genna tuli nia’ a’jaga ri pakke’bu’ lompoa.

17Allo-allona ri bageang rayangngang nia’ annang pangawala’, ri bageang wara’ nia’ appa’ siagang bageang timboro’ nia’ appa’. Sikamma gudang pakkakasaka nijagai tongi ri appa’ tau, ta’rua tau se’re-se’re gudang.

18Ri balla’ ga’ga bageang laukanga niboliki appa’ pajaga ri oloanga, siagang rua pajaga kalenna anjo balla’ ga’gaya.

19Kammaminjo pambageang tugasa’ pangawalaka napassareanga mae ri passibijanna Korah siagang passibijanna Merari.

20Tumaraengannaya lalang ri suku Lewi nisarei tanggong jawa’ mae ri barang-barang niaka lalang ri Balla’Na Batara, siagang mae ri gudang tampa’ pammolikang sikamma apa-apa lanipassareanga mae ri Allata’ala.

21Ia Ladang, iami sitau ana’ bura’ne battu ri Gerson. Iami nakabattui siapa area pa’rappungang passibijang, kammayami pole bijanna Yehiel, ana’na.

22Ana’-ana’na Yehiel, iamintu Zetam siagang Yoël, ia nisarea tanggong jawa’ mae ri gudang-gudanga siagang doe’na Balla’Na Batara.

23Turunganna Amram, Yizhar, Hebron, siagang Uziel, anggappa’ tongi bageang lalang tugasa’.

24Sebuel battu ri passibijang Gersom, ana’na Musa, iami anjagai barang-baranga lalang ri Balla’Na Batara.

25Nia’ passisambung kaluargana Selomit tete ri Eliezer sari’battanna Gersom. Ia garisi’ turunganna Eliezer sa’genna Selomit iamintu: Eliezer, Rehabya, Yesaya, Yoram, Zikhri, Selomit.

26Selomit siagang bija pammanakanna tanggong jawa’ mae ri sikontu passare napassareanga Karaeng Daud, kapala-kapala kaluargaya, pamimping-pamimping pa’rappungang bijaya, siagang sikamma perwira tinggina tantaraya.

27Anjo sikamma passarea iami sipa’gang battu ri barang-barang narampasaka ke’nanga lalang pa’bundukang, siagang passarena ke’nanga untu’ eroka lanipake poro untu’ lalang ri Balla’Na Batara.

28Bodona kana, Selomit siagang kaluargana iami tanggong jawa’ mae ri sikontu apa le’baka nipassareang untu’ poro eroka nipake lalang ri Balla’Na Batara, kammaya pole sikamma passare tete ri Na’bi Samuel, ia le’baka napassareang Karaeng Saul, Abner ana’na Ner, siagang Yoab ana’na Zeruya.

29Turunganna Yizhar, iamintu Kenanya siagang ana’-ana’na, nisarei tugasa’ untu’ urusanna sura’-sura’ negaraya siagang tugasa’-tugasa’ pangadelanna Israel.

30Sikontu urusang kaagamaanga siagang urusang pamarentahanga ri Israel bageang laukanna Binanga Yordan nipassareangi mae ri Hasabya, siagang ri 1.700 bija pammanakanna: yangasenna ke’nanga sangnging tau nipangngaliki ri turunganna Hebron.

31Pamimpinna turunganna Hebron iamintu Yeria. Ri taung makapatampulona taung pamarentahanna Karaeng Daud, disalidikimi ri sesena turunganna Hebron. Lalang ri anjo panyalidikanga a’nyatai angkanaya jai ri ke’nanga tantara-tantara kassa’, ammantanga ri Yazer lalang ri daera Gilead.

32Sikontu urusang kaagamaanga siagang pamarentahanga ri Israel bageang rayanganna Binanga Yordan — iamintu daera suku Ruben, Gad siagang sipa’gang suku Manasye — nipassareangi mae ri 2.700 kapala kaluarga Yeria, yangasenna sangnging tunikangalikang ia nipilea ri Karaeng Daud.


  Share Facebook  |  Share Twitter

 <<  1 Tawarikh 26 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran