Alkitab Mobile SABDA
[VER] : [TORAJA]     [PL]  [PB] 
 <<  Bilangan 12 >> 

Iatu Miryam diparampoi ukungan golen

1Iatu Miryam sola Harun unta’tan Musa diona baine to Kush tu napobaine, belanna napobainemo tu misa’ baine to Kush.

2Ma’kadami sola duai nakua: Tete dio mannaraka pudukna Musa tu PUANG ma’kada, tae’ dukaraka natete dio kami anNa ma’kada tu Puang? Narangimi PUANG te kada iate.

3Iatu Musa iamoto mandu malamma’ penaanna, losong na iatu mintu’ tau dao kuli’na padang.

4Ta’pa ma’kadami tu PUANG lako Musa, Harun sola Miryam, Nakua: Tassu’komi sola tallu lako Tenda Kasitammuan. Tassu’mi sola tallui.

5Songlo’mi tu PUANG lan lentong gaun, Nabendan dio to’ ba’ba Tenda Kasitammuan, Natambaimi tu Harun sola Miryam, malemi sola duai mennolo.

6Ma’kadami tu Puang Nakua: Perangimi tu kadangKu. Iake denkomi misa’ nabi, ma’din Kupasombo tu Kaleku lan patiro mendeata, ba’tu ma’kada lako kalena lan tindo.

7Apa tae’ Kupasusi to tu taungKu Musa tu manappa’ lan mintu’ banuangKu.

8PudukKu kalena sipa’kada pudukna, Kupamanassan tongan sia tae’ Kubunianni, sia natiro tu pa’kaleanNa PUANG, ma’apai anna tae’ mimataku’ unta’tanni tu taungKu Musa?

9Iamoto nare’dek tu ara’Na PUANG lako tu tau sola duai, anNa male tu Puang.

10Iatonna tiangka’mo tu gaun dao Tenda Kasitammuan, pakalan golenammi tu Miryam susito ambun makko. Iatonna messailemo tu Harun lako Miryam, natiromi tu misa’ to golenan.

11Ma’kadami tu Harun lako Musa nakua: O puangku, da mipapassannikan te kasalan iate, tu kipogau’ diona kabagangki.

12Da nasusi to pia mate dadi mangura, tu bosimo duku’na pira, tonna tassu’ lan mai pa’tambukanna indo’na.

13Metambami tu Musa lako PUANG nakua: O Puang Matua, pamondoi tu golenna.

14Ma’kadami tu PUANG lako Musa, Nakua: Iake natittudui ambe’na tu lindona, tae’raka na la dipakasiri’ lan pitung allo? Elo’namo nadipasalian to’ tenda pitung allo, namane ma’din sule sirau tau.

15Dipasalianmi to’ tenda tu Miryam pitung allo; iatu tau iato tae’pa nake’de’ dio mai, tonna tae’pa nasule tu Miryam sirau tau.

16Mangkato ke’de’mi tu tau dio mai Hazerot, anna ma’tenda lan padang pangallaran Paran.



 <<  Bilangan 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel