Dual Panel1Patettong towi Salomo saoraja untu’ aléna. Ittana napatettong iyaro saorajaé seppulo tellu taung.
2Ri saorajaéro mébbui Salomo bili’ iya riyasengngé "Baruga Ale Libanon". Ukkuranna: lampéna 44 météré, sakkana 22 météré sibawa tanréna 13,5 météré. Iyaro barugaé mappunnaiwi tellujjiji alliri polé ri aju camara Libanongngé; tungke jiji seppulo lima alliri sibawa ri yasé’na ripasangngi kaso-kaso polé ri aju camara Libanongngé. Sampe’na riyébbui polé ri aju iya padaé sibawa natongkoi iyaro kaso-kasoé.
3(7:2)
4Ri renring abiyo sibawa ataunna iyaro barugaé engka tello-tellongeng: tellujjiji ri renring iya séddié siyolong sibawa tellujjiji ri renring iya laingngé. Pamirinna sining tange’na sibawa tellongenna massulapa eppai mallampé.
5(7:4)
6Patettong towi Salomo "Baruga Pilar". Lampéna iyaro barugaé 22 météré sibawa sakkana 13,5 météré. Ri yolona iyaro barugaé engka légo-légo iya mappilar-é sibawa makkéaddénéng.
7Baruga iya laingngé iyanaritu "Baruga Akkarungengngé" iya riyasengngétto Baruga Angadélékengngé. Iyaé barugaé mappammulai témbo’na lettu ri kaso-kasona rilapiriwi sibawa aju camara Libanon. Ri barugaénnaé Salomo pettuiwi parakara-parakara angadélékengngé.
8Onrong naonroiyé Salomo riyébbui pada-pada sining bola laingngé sibawa engkai ri seddé lainna ri monrinna Baruga Angadélékengngé. Untu’ bainéna, iyanaritu ana’na arung Maséré, patettong towi Salomo bola iya sinrupaé.
9Sininna iyaro bolaé, muttama’ni seddéna malowangngé, polé ri pandaménna lettu ri pabbingenna, riyébbui polé ri batu iya makessingngé. Iyaro batu-batué ripassadiyai ri onrong akkaling batué, sibawa rirette situru ukkuranna; bagiyang ri lalenna sibawa saliwenna riparatai sibawa garagaji.
10Pandaménna sining bolaéro riyébbui polé ri batu-batu loppoé iya mangke’é. Iyaro batu-batué engka iya 3,5 météré lampéna, engkato iya eppaé météré.
11Ri yasé’na ripasangngi batu-batu laing iya mangke’é sibawa rette’i situru ukkuranna, nainappa ritongko sibawa aju camara Libanon.
12Témbo’na seddé saorajaé sibawa témbo’na seddé ri lalenna Bolana PUWANGNGE enrengngé témbo’na barugaé ri seddé yolona Bolana PUWANGNGE, tungke-tungke poléi riséddié lapi aju camara Libanon ri yasé’na tungke tellullapi batu.
13Ri kota Tirus engka séddi tau worowané riyaseng Huram. Tonget-tongengngi ahli sibawa maéga pangalamanna ri laleng mébbui sininna rupanna barab-barang gessaé. Ambo’na iya matéénna iyanaritu tau Tirus sibawa ahli towi ri laleng barab-barang gessaé. Indo’na poléi ri suku Naftali. Purani nasuro tauwé Arung Salomo lao mobbii Huram untu’ polé sibawa kapalaiwi sininna jama-jamang akkébbureng barab-barang gessaé. Napoléna Huram sibawa napogau’ni aga iya naéllauwé Salomo.
14(7:13)
15Mébbui Huram duwa alliri gessa tungke-tungke 8 météré tanréna, lébuna 5,3 météré, sibawa ompe’na gessana 7,4 sénti. Iyaro alliri-allirié sebbo ri lalenna.
16Untu’ iyaro alliri-allirié mébbui duwa ulu alliri polé ri gessaé, tungke-tungke tanréna 2,2 météré
17pada-pada bunga bakungngé tanréna 1,8 météré. Tungke iyaro ulu allirié ribélo-béloiwi buwa dalima polé ri gessaé. Iya manenna engka duwa ratu buwa dalima ri tungke ulu allirié. Nainappa Huram mébbu anengeng ranté polé ri gessaé nanataroi ri yasé’na sining alliriéro. Engka pitu anengeng ranté ri yasé’na tungke allirié, sibawa ri yasé’na iyaro anengeng ranté engka séddi pallangga mallébué. Ri yasé’nana iyaé pallangga mallébué
18(7:17)
19(7:17)
20(7:17)
21ripakkenna iyaro ulu-ulu alliri pada-padaé bunga bakung ri alliri-alliriéro. Iyaro alliri-allirié ritaroi ri yolona sumpang muttama’é ri Bolana PUWANGNGE — séddi ri seddé yattang, iya laingngé ri seddé manorang. Iya ri yattangngé riyasengngi Yakhin sibawa iya seddé manorangngé riyasengngi Boas. Makkuwaniro Huram pattépui iyaro alliri-allirié.
22(7:21)
23Nainappa Huram mébbu séddi kullang gessa iya mallébué, sibawa ukkuranna makkuwaiyé: liyunna 2,2 météré, sakkana tengngana 4,4 météré sibawa lébuna 13,2 météré.
24Ri mattulilinna wiring saliwenna ribélo-béloiwi sibawa duwajjiji buwa lawo, iya nacuwangngé silaong kullangngéro.
25Iyaro kullangngé napalénne’i ri yasé’na lekke’na seppulo duwa saping gessa — tellu mangolo ri manorang, tellu ri yattang, tellu ri yajang sibawa tellu ri alau.
26Ompe’na iyaro kullangngé 75 milli. Wirinna sinrupai wiring cangkiri iya mabbéngko’é massu maélo pada bunga bakung iya tabbakkaé. Iyaro kullangngé naullé mala uwaé kira-kira 40.000 bang.
27Mébbu towi Huram seppulo karéta gessa, tungke-tungke lampéna 1,8 météré, sakkana 1,8 météré, tanréna 1,3 météré.
28Iyaro karéta-karétaé poléi ri pépeng-pépeng massulapa’é iya ripasangngé ri laleng pamiringngé.
29Iyaro pépeng-pépengngé ribélo-béloiwi sibawa sobbi singa, saping sibawa kérub. Ri pamiring-pamirinna — ri yasé’na sibawa ri yawana gambara-gambara singaé sibawa sapingngéro — taggattungngi sobbi bunga maddéppungngé.
30Tungke iyaro karétaé mappunnaiwi eppa padati gessa sibawa pattoddo padatinna polé towi ri gessaé. Ri iya eppa sunna iyaro karétaé engka alliri pattahang katowang polé ri gessaé sibawa bélo-bélo bunga maddéppung ri seddé saliwenna.
31Bagiyang yasé’na iya eppa alliri pattahangngéro ripasisumpungngi riséddié pamiring mallébu untu’ pattahang katowanna. Iyaro alliri-alliri pattahangngé malliwengngi 44 sénti tanréna ri yasé’na pépeng massulapa’éro, sibawa 22 sénti ri yawana. Ri témunna pamiringngéro engka sobbi.
32Tanréna padati-padatinna 66 sénti; onronna ri yawana pépeng-pépengngé. Pattoddo padatinna sibawa karétaé sinrupai séddi bagiyang.
33Iyaro padati-padatinna pada-padai karéta musué; lébu padatié, tarali-taralinna, pattoddo’na sibawa posina tarali-taralinna padatié iya manenna riyébbui polé ri gessaé.
34Engka eppa alliri pattahang ri tungke sung bagiyang yawana karétaéro. Iyaro alliri-allirié sinrupai séddi bagiyang sibawa karétana.
35Ri mattulilinna bagiyang yasé’na iyaro karétaé engka pamiring lebba’na 22 sénti. Alliri pattahanna sibawa pépeng-pépenna iya manenna sinrupai séddi bagiyang sibawa karétana.
36Alliri-alliri pattahangngé sibawa pépeng-pépengngéro ribélo-béloiwi sibawa gambara kérub, singa, sibawa pong pattuku kégi-kégi engka onrong iya lobbangngé untu’ iyaro, nasibawang bunga maddéppung mattulilinna.
37Makkuwaniro carana riyébbu iyaro karéta-karétaé. Iya manenna pada-pada — bentu’na sibawa ukkuranna.
38Mébbu towi Huram seppulo katowang loppo, séddi untu’ tungke karéta. Tungke katowangngéro mappunnaiwi sakka 1,8 météré sibawa naullé mala uwai 800 bang.
39Nataroi Huram lima karéta ri seddé yattanna Bolana PUWANGNGE, sibawa lima ri seddé manorang. Kullang gessaé nataroi ri sung alau yattang.
40Mébbu towi Huram pamuttu-pamuttu, kénro-kénro sibawa mangko-mangko. Purairo tépu manenni jama-jamanna untu’ Arung Salomo untu’ Bolana PUWANGNGE. Iyanaé passakke’na iya puraé naébbu: Duwa alliri loppo Duwa ulu alliri pada-pada mangko’é iya ritaroé ri coppo’na iya duwa alliriéro Anengeng ranté ri tungke ulu allirié Eppa datu dalima gessa iya risusungngé duwajjiji mattulilingiwi anengeng ranté ri tungke ulu allirié Seppulo karéta Seppulo katowang Kullang gessa Seppulo duwa saping gessa iya tula’éngngi kullangngéro Pamuttu-pamuttu, kénro-kénro sibawa mangko-mangko. Sininna passake untu’ Bolana PUWANG-ngéro, iya naébbué Huram untu’ Arung Salomo, riyébbui polé ri gessaé, sibawa rigoso gangka lala’.
41(7:40)
42(7:40)
43(7:40)
44(7:40)
45(7:40)
46Arungngé massuro mébbui iyaro barab-barangngé ri accuwangeng bessié ri pallawangenna Sukot sibawa Sartan ri Lompo Yordan.
47Dé’ nassuro timbangngi Salomo iyaro barab-barang gessaé, saba’ maéga senna jumellana. Jaji tane’na iyaro barab-barangngé dé’ nariisseng.
48Massuro mébbu towi Arung Salomo passakke-passakke laing polé ri ulawengngé untu’ Bolana PUWANGNGE. Iyanaé passakke-passakke iya naébbuéro: Mézba Méjang untu’ roti iya riyakkasuwiyangengngé lao ri Allataala Seppulo ajé pajjennangeng iya nataroé ri yolona Bili’ Pommapaccingngé, iyanaritu lima ri seddé yattang sibawa lima ri seddé manorang Bunga-bunga Pajjennangeng-pajjennangeng Passipi-sipi Cangkiri-cangkiri Pakkakkasa pappeddé pajjennangeng Mangko-mangko Penné-penné untu’ dupa Penné-penné untu’ bara Sélé-sélé untu’ tange’na Bili’ Pommapaccingngé sibawa tange-tange ri saliwenna Bolana PUWANGNGE.
49(7:48)
50(7:48)
51Puranana napatettong Arung Salomo Bolana PUWANGNGE, nataroni ri laleng gudanna bolaéro sininna péra’é, ulawengngé sibawa barab-barang laing iya puraé nakkasuwiyangeng Daud ambo’na lao ri PUWANGNGE.